भांगरभूंय | प्रतिनिधी
राजू बर्वे: वाळपय केशव सेवा साधना विशेश भुरग्यांचे शाळे वतीन जागृताय कार्यावळ
वाळपय ः दिव्यांग व्यक्तींक समाजांत जगपा खातीर मान, सन्मान तशेंच प्रोत्साहन आनी मजतीची खरी गरज आसा. समाजांत तांकां वायट वागणूक दितात. ती खंयतरी आडावपाक जाय. तांकां आत्मविश्वास आनी मार्गदर्शन योग्य वेळार मेळ्ळ्यार समाजांत जगपाक तांकां उर्बा मेळटली अशें राजू बर्वे हांणी सांगलें. वाळपयच्या केशव सेवा साधना विशेश भुरग्यांचे शाळेंत आयोजीत केल्ले विशेश व्यक्तीचेर जनजागृती कार्यावळींत ते मुखेल सोयरे म्हणून उलयताले.
राजू बर्वे हे एक फोटोग्राफर. पूण कांय वर्सां पयलीं एका अपघातांत तांचे दोनूय पांय काम करिना जाले. पूण हार मानिनासतना येवपी संकटांक तोंड दीत तांणी समाजांत आपली एक वेगळी वळख निर्माण केली.
वाळपय भलायकी केंद्रांत हे जागृताय कार्यावळींत शाळेचे वेवस्थापक डॉ. अशोक आमशेकार, शाळेची ़इंचार्ज मैथली परब, ईश्वरी मोरजकार आनी हेर मानेस्त हाजीर आशिल्ले.
डॉ. अशोक आमशेकार हांणी ह्या वेळार आपले विचार मांडले.
फोंडेंचे दिव्यांग साईश नायक हांची भयण डॉ. स्नेहा नायक हांणी आपल्या भुरग्याक आवय बगर आनीक कोणूच समजपाक शकना. मानसीक दुयेतींक आयज समाजीक फाटबळाची गरज आसा अशें तिणें सांगलें.
दिवचल हांगची दिव्यांग विभा काणेकार हांणी, आपूण आयज आपले आवयच्या आत्मविश्वास आनी मार्गदर्शनाक लागून समाजांत एक वेगळी वळख निर्माण करपाक शकलीं अशें सांगलें. ती एक बरी गायिका जावन आसा. तशेंच तिका खुबश्या पुरस्कारां वांगडा बालश्री पुरस्कारूय फावो जाला. हे कार्यावळींत तिणें एक गीत गावन सगळ्यांचीं मनां जिखलीं.
मैथली परब हांणी आपलें मनोगत ह्या वेळार उक्तायलें.
सुरवातेक मानेस्तां हस्तुकीं दिवली पेटोवन कार्यावळ सुरू जाली. मानेस्तां हस्तुकीं साईश नायक, विभा काणेकार आनी राजेश हांचो ह्या वेळार भोवमान जालो. येवकार मैथली परब आनी सुत्रसंचालन शिक्षिका ईश्वरी मोरजकार, नेहा परब आनी धीरज सावंत हांणी उपकार मानले. ह्या वेळार व्हडा संख्येन पालक आनी हेर हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
