भांगरभूंय | प्रतिनिधी
युवा पणजीन गोंय राजभाशा संचालनालयाच्या जोड पालवान एका दिसाची ‘प्रशासनांत कोंकणीचो वापर’ ही जागृताय कार्यावळ, 29 नोव्हेंबराक पाटो, पणजेच्या कला आनी संस्कृती संचालनालयाच्या भोवउद्देशी सभाघरांत आयोजीत केल्ली. तिका हाजीर रावून म्हाका समजलें की राजभाशेचो सद्या अधिकृत संदर्भांत खूबच उणो वापर जाता.
हाचेर हांव आदरपूर्वक विनवणी करतां की वेगवेगळ्या सरकारी खात्यांत, शिक्षणीक संस्थांनी, स्वायत्त प्राधिकरणांनी, म्हामंडळांनी काम करपी दिव्यांगता आशिल्ल्या सरकारी कर्मचाऱ्यां खातीर एक पुराय समर्पीत पांच दिसांची कार्यावळ घडोवन हाडची. तातूंत तांच्या- तांच्या कार्यालयांत कोंकणी भाशेचो वापर आनी प्रचार करपा विशीं जागृताय करची. गरज पडल्यार कायद्यान सांगिल्ले प्रमाण समावेशकताय सुनिश्चीत करपा खातीर दिव्यांगता नाशिल्ल्या सरकारी कर्मचाऱ्यांचोय आस्पाव कार्यशाळेंत करूं येता.
दिव्यांगता आशिल्ल्या व्यक्तींच्या हक्का विशीं कोंकणींतल्यान सत्रां करपा खातीर सर्वसमावेशक अशी कार्यशाळा आयोजीत करची. ह्या उपक्रमाक लागून राजभाशेचें गिन्यान वाडटलेंच, पूण समावेशकता आनी भौशिक वाठारांनी प्रवेश सुलभताय वाडटली. दिव्यांगता आशिल्ल्या कर्मचाऱ्यांक सशक्त करपाक, तशेंच कोंकणी आनी दिव्यांगता आशिल्ल्या व्यक्तींच्या हक्का विशीं जागृताय निर्माण करपा खातीर तांकां हाजीर रावप सक्तीचें करचें.
ते भायर आयकुपाची दिव्यांगता आशिल्ल्या सरकारी कर्मचाऱ्यांक सुलभताय मेळची हे खातीर सत्रांवेळार सांकेतिक भास दुभाश्याची तरतूद सक्तीन करची.
– विशांत नागवेंकार
9850930415
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
