भांगरभूंय | प्रतिनिधी
सरकारी विभागांच्या अभियंत्यां खातीर ’ओपनिंग मायंड्स टू युनिव्हर्सल डिझायन’ कार्यशाळा
पणजी: राज्य दिव्यांगजन आयोग आनी डिझायन ब्रिज डायव्हर्सिटी अॅण्ड इनक्लुजन फावंडेशन, पुणे हांच्या जोड पालवान विवीध सरकारी विभागांच्या अभियंत्यां खातीर ’ओपनिंग मायंड्स टू युनिव्हर्सल डिझायन’ हें दोन दिसांची तांत्रीक प्रशिक्षण कार्यशाळा
आयोजीत केल्ली.
अभियंत्यांक ’युनिव्हर्सल डिझाईन’ म्हळ्यार सगळ्यां खातीर एकूच निर्मिती हाचें म्हत्व आनी गरज कळचे खातीर हे प्रशिक्षण आल्तिनो हांगच्या गोवा राज्य कर भवन हांगां आयोजीत केल्लें. ह्या वेळार दिव्यांग व्यक्ती सक्षमीकरण विभाग, समाजीक न्याय आनी सक्षमीकरण मंत्रालय, भारत सरकार हांचे कडेन जोडिल्ले डॉ. कविता मुरुगकर, डिझायन ब्रिज डायव्हर्सिटी अॅण्ड इनक्लुजन फावंडेशन, पुणेचे अभिजित मुरुगकर आनी आर्किटेक्ट अरुंदती गुप्ता प्रशिक्षक म्हणून हाजीर आशिल्लीं.
अपंगत्वांक अनुकूल भौशीक मुळाव्या सुविधांच्या प्रस्ना़ विशीं अभियंत्यांक संवेदनशील करप आनी प्रशिक्षण दिवप हो हे कार्यशाळेचो मुखेल हेत आशिल्लो. समावेशक वातावरण तयार करपाक वृत्तींत बदल घडोवन हाडप गरजेचें. लोकांची मानसिकताय बदल्ल्या उपरांत भौशीक मुळाव्या सुविधांचो वापर सोंपो जातलो अशें राज्य दिव्यांगजन आयुक्त गुरुप्रसाद पावसकर हांणी सांगलें.
हे कार्यशाळे मजगतीं दिव्यांग व्यक्ती कायदो, 2016, राष्ट्रीय इमारत संहिता आनी युनिव्हर्सल डिझाइनाचे म्हत्व हाचेर म्हायती दिली.
कार्यशाळेच्या दुसर्या दिसा शारिरीक दिव्यांगत्व आशिल्ले विशांत नागवेंकार आनी पॅट्रीक डिसोझा तशेंच महादेव सावंत हांणी दिव्यांग व्यक्तींक भौशीक इमारतींत प्रवेश करतना येवपी आव्हानांविशीं समजावन सांगलें.
हे कार्यशाळेंत पुरातत्व विभाग, गोंय गृहनिर्माण मंडळ, म्हापशें आनी मडगांव नगरपालिका, भौशीक बांदकाम विभाग, दक्षीण गोंय नियोजन आनी विकास प्राधिकरण, उत्तर गोंय नियोजन आनी विकास प्राधिकरण, स्मार्ट सिटी आनी गोंय राज्य पायाभूत सुविधा विकास महामंडळ मर्यादीत हाचे वांगडा खुबशे सरकारी संस्थांचे अभियंते ह्या वेळार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
