भांगरभूंय | प्रतिनिधी
पणजी : दिव्यांगजन आयुक्त कार्यालया वतीन कलर्स ऑफ रेझिलन्सचें आयोजन केलां. नामनेचे कलाकार, कवयित्री आनी दिव्यांगांच्या सक्षमीकरणाचो पुरस्कार करपी फ्रेडरिका मिनेझीस हांचे संकल्पनेंतल्यान दिव्यांग व्यक्तींत जागरुकताय निर्माण करपाक हे कार्यावळीचें आयोजन केल्ल्याची म्हायती आयोगाचे सचीव ताहा हाजिक हांणी दिली. शेनवारा पर्वरे जाल्ले पत्रकार परिशदेंत ती उलयताली.
हाजीक हांणी सांगलें, ही कार्यावळ शुक्रार १५ ते १७ नोव्हेंबर मजगतीं वायंगिणी दर्यादेगेर ताज सिदाद दि गोंय हेरिटेजींत जातली. ह्य उपक्रमा खाला १५ तारखेक सांजेवेळार ६ ते ८.३० वरां मजगतीं प्रिव्ह्यू फेलोशिपचें आयोजन केलां. जाल्यार १६ आनी १७ नोव्हेंबराक सकाळच्या १० ते सांजेवेळार ८ वरां मेरेन कलाप्रदर्शन जातलें. तशेंच कार्यावळींत प्रदर्शन, चर्चासत्रां आनी विवीध कलाप्रकारांचें प्रदर्शन आसतलें.
दिव्यांग व्यक्तींच्या कलात्मक प्रतिभेचें प्रदर्शन घडोवप, चित्रकला, शिल्पकला अशा विवीध कलां वरवीं आपले दृश्टीकोन उक्तावप हें कलर्स ऑफ रेझिलिन्सचें सपन आसा. प्रदर्शनांत सादर जावपी सगळ्या कलासाहित्याचो लिलाव करतले. हाचे वरवीं मेळिल्ल्या उत्पन्नाचो कांय वांटो सरळ संबंदीत कलाकारांक दितले. तशेंच हे निधींतल्यान दिव्यांग सक्षमीकरण, प्रवेशसुलभताय आनी समावेशनाक सक्रियपणा उर्बा दिवपी समाजीक संस्थांक फाटबळ दितले.
१५ नोव्हेंबराक प्रिव्ह्यू फेलोशिपांत प्रसिद्ध एस्टोनियन शिल्पकार तावनो कांग्रो हे प्रत्यक्ष शिल्पनिर्मिती करतले. ह्या शिल्पाचोय लिलाव करून निधी उबारतले. ह्या वेळार मनोज दास हे प्रत्यक्ष चित्रकृती सादर करतले.
निधी शर्मा हांच्या ऑनसायट चित्रकृतीय पावणे खातीर दवरतले. संतूर विशारद आनी संगीतकार नवाब खान हांची सांजेवेळार जावपी संतूरवादन कार्यावळ जातली अशें हाजीक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
