भांगरभूंय | प्रतिनिधी
सरन्यायाधीशः आंतरराष्ट्रीय पर्पल फेस्ट- 2024 कॉफी टेबल बुकाचें प्रकाशन
भांगरभूंय । खबरां मेज
पमजीः फुडारांत भारतांत दिव्यांग व्यक्तींक सर्वसमावेशी समाजांत सहजतायेन वावुरपाक मेळटले, अशी वातावरण निर्मिती आपल्याक अपेक्षीत आसा. दिव्यांगजनांक समाजाच्या सगळ्याच मळार सोंपेपणी वांटेकार जावपाक मेळचे खातीर गरजेच्या उपाय येवजण्यां खातीर दिव्यांगजनां वांगडा नेमान संवाद जायत रावप गरजेचें थारतलें, अशें सरन्यायाधीश डॉ. डी. वाय. चंद्रचूड हांणी सांगलें.
इंडिया अॅक्सिबिलिटी समीट आनी राज्य दिव्यांगजन आयुक्त परिशद 2024 मजगतीं सरन्यायाधीश चंद्रचूड हांणी आंतरराष्ट्रीय पर्पल फेस्ट- 2024 विशींच्या कॉफी टेबल बुकाचें प्रकाशन केलें. ह्या वेळार ते उलयताले. दिव्यांग व्यक्तीं खातीर सर्वसमावेशकता आनी प्रवेश सोंपेपणाक उर्बा दिवपाच्या उद्देशान बंगळुरू शारांत आयोजीत केल्लो हो उपक्रम एक मैलाचो चिरो थारलो.
ह्या सुवाळ्याक सर्वोच्च न्यायालयाची न्यायाधीश बी. व्ही. नागरत्न, केंद्रीय दिव्यांगजन आयुक्तालयाचे मुख्य आयुक्त तशेंच केंद्र शासनाच्या दिव्यांगजन सक्षमीकरण विभागाचे सचीव राजेश अगरवाल (आयएएस), कर्नाटक उच्च न्यायालयाचे मुख्य न्यायाधीश एन. व्ही. अंजारिया, पद्मश्री पुरस्कार फावो जाल्ले तशेंच पर्पल अम्बेसिडर व्यंकटेश येथिराज आनी राज्य दिव्यांगजन आयुक्त (गोंय) गुरुप्रसाद पावसकार हाजीर आशिल्ले. पावसकार हांणी सर्वसमावेशक समाज निर्मिती खातीर नेमान यत्न करपाचे गरजेचेर भर दिलो. तांणी सांगलें, दिव्यांग वक्तीं मदली जिद्द, निर्धार आनी तांची यशोगाथा मनोवचे खातीर एक आशेचें कीर्ण आनी प्रभावी माची म्हूण आंतरराष्ट्रीय पर्पल फेस्ट हो उपक्रम काम करता. खंयचेय तांकीचे पलतडी वचून दरेके व्यक्तीक संद आनी संसाधनांचो लाव घेवपा खातीर समान न्याय मेळचो ही आमची लागणूक. कॉफी टेबल बूक हें फक्त अणभवांचें संचीत इतले पुरतेंच मर्यादीत ना. सर्वसमावेशक आनी प्रवेश सोंपेपण समाजाचे दिशेन आमच्या सामुहीक प्रवासाचें प्रतिबिंब आसा. सगळ्या व्यक्तींच्या हक्कांचें आनी प्रतिश्ठेचें संरक्षण करीत रावचे खातीर विचारांचो आनी पुरस्कार करीत रावप तशेंच ते खातीर पुरक धोरण चालीक लावप गरजेचें आसा, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
