दिव्यांगजनांच्या आत्मसन्मानाचो विचार करात

भांगरभूंय | प्रतिनिधी

पुनीतकुमार गोयलः भौशीक बांदकाम अभियंते, वास्तूविशारदां खातीर जाणीव निर्मिती कार्यशाळा

भांगरभूंय । खबरां मेज

पणजीः आमी जेन्ना भौशीक साधनसुविधांच्यो रचना निर्मिती वा प्रत्यक्ष काम करतात तेन्ना दिव्यांगजानां खातीर समानता, तांचो आत्मसन्मान हे गजालींचो विचार करप गरजेचें आसा, अशें गोंयचे मुख्य सचीव पुनीतकुमार गोयल सांगलें.

गोंय राज्य दिव्यांगजन आयुक्त कार्यालया वतीन गोंयच्या भौशीक बांदकाम खात्यांतले सगळे अभियंते आनी वास्तूविशारद हांचे खातीर दोन दिसांचें जाणीव निर्मिती कार्यशाळेचें आयजोन केल्लें. पुनीतकुमार गोयल हांचे हस्तुकीं कार्यशाळेचें उक्तावण जालें. ह्या वेळार ते उलयताले.

13 आनी 14 जूनाक जाल्ले कार्यशाळेंत गोंयांतल्या मुळाव्या सुविधांची निर्मिती वा उदरगत करतना दिव्यांगजनांच्यो गरजो, तांचे हक्क, त्यो साधनसुविधा वापरचे खातीर गरजेचें सोपेंपण आनी सर्वसमावेशकता हाडप हे नदरेन जाणीव निर्मिती आनी जागरूकता वाडोवपाच्या उद्देशान ही कार्यशाळा घेतिल्ली. अधिकारी वर्गा खातीर आशिल्ल्या प्रशिक्षण माळेंतली ही तिसरी कार्यशाळा आशिल्ली.

दिव्यांगजनां सयत सगळ्यांच लोकांक फायदो जातलो अश्यो सुविधांचे निर्मितींत भौशीक बांदकाम खात्याची भुमिका म्हत्वपूर्ण थारतली. आमी सगळे जाण्टे जातकच कुडीची तांक उणी जाता आनी दिव्यांगत्व येता. ही गजाल मतींत दवरून दरेकल्याक सोंपो, सहज प्रवास करपाक मेळटलो अशे रस्ते बांदपाची गरज आसा. हेर देशांतल्यो बऱ्यो देखी तशेंच ह्या उद्देशा खातीर वावुरपी संस्थांचें काम हाचे कडल्यान आमी धडो घेवप गरजेचें आसा. आमी आमचो वैचारीक दिश्टीकोन बदलपाक जाय, अशें गोयल हांणी सांगलें.

राज्य दिव्यांगजन आयुक्त गुरुप्रसाद पावसकार हांणी सांगलें, कार्यशाळेंत गोंयांतल्यो मुळाव्यो सुविधा देखीक इमारती, रस्ते, दर्यादेगो आनी हेर उपक्रमा विशीं दिव्यांगजनां खातीर वापरपाक सोप्यों आशिल्ल्या साबार तजविजांचेर चर्चा केली. जाणीव निर्मिती कार्यशाळा आयोजीत केले उपरांत बस आनी शाळा हे सारकिल्ल्यो सेवा वापुरपी दिव्यांगजनां कडल्यान सकारात्मक प्रतिसाद मेळ्ळो अशें तांणी स्पश्ट केलें.

जिणेच्या सगळ्याच मळार आत्मसन्मान, आदरभावना आनी समानता मेळटली हें सुनिश्चीत करचे खातीर आमी दिव्यांगजन हक्क कायदो 2016ची अंमलबजावणी करतात. इमारत, रस्तो, दर्यादेग वा हेर खंयच्योय साधनसुविधा सगळ्या खातीर वापरपाक सोप्यो, सर्वसमावेशक करच्यो ही गजाल हो कायदो सक्तीची करता. सरकार हें करपाक बांदील आसा. दिव्यांगजनांची तांक आनी विविधतायेन नटिल्ल्या गुणांचो सुवाळो मनोवचे खातीर तांणी पर्पल फेस्ट सारकिल्ल्यो कार्यावळी आयोजीत करतात, अशीय म्हायती तांणी दिली.

हे कार्यशाळेचे मुखेल मार्गदर्शन डिझायन ब्रीज डायव्हर्सिटी अँड इनक्लुजन फावंडेशनाचे संस्थापक अभिजीत मुरुगकर हांणी केलें. स्वातंत्र्या उपरांत फाटल्या 75 वर्सां मदीं दिव्यांगजनां खातीर वापरपाक सोप्यो, आडखळ नाशिल्ल्यो साधनसुविधा उबारपाचेर भर दिनासतना खूबश्यो इमारती, येरादारी सुविधा उबारल्यो. आतां फुडले पिळगेचो विचार करून आमी क्ल्ल्यो चुको परतून करच्यो न्हय. बदल ही दीर्घकालीन आनी परिवर्तनीय प्रक्रिया आसा. ही प्रक्रिया रचने पासून सुरू जाता,अशें मुरुगकर हांणी सांगलें.

दोन दिसांचे कार्यशाळेंत वाटो घेतिल्ल्या भारतांतले दिव्यांगत्वाचे प्रकार, दिव्यांगजनांचे अधिकार, ह्या अधिकारांचे अंमलबजावणी खातीर उपलब्ध कायदे आनी धोरणात्मक चौकट, तशेंच भौशीक रचना निर्मितींतली सगळ्यांत बरी पद्दत आनी वापरपाक सोपी ह्या गजालींचेर जाणीव निर्मिती करपाक मजत जाली. कार्यशाळेंत संवेदना निर्मिती प्रक्रिया, तंत्रीक परिक्षण पद्दत आनी सरकारी  विभाग पांवड्या वयलीं आव्हानां तशेंच संदी हाचेर गट चर्चा ह्या सत्रांचो कार्यशाळेंत आस्पाव आशिल्लो. फकत जाणीव निर्मिती करप आनी तंत्रीक प्रशिक्षण आयोजीत करप आनी तें पुराय करप इतले पुरतोच हो विशय मर्यादीत ना. ह्या प्रशिक्षणार्थींची तांक वाडोवपाचो यत्न हे फुडेंय करीत रावतले. गोंयांत सर्वसमावेशक आनी सगळ्यां खातीर वापरपाक सोपी अशा मुळाव्या सुविधांचो निर्माण करपाची संस्कृती निर्माण करप, ही निमणी मोख आसा, अशें डिझायन ब्रीज डायव्हर्सिटी अँड इनक्लुजन फावंडेशनाची सहसंस्थापक कविता मुरुगकर हांणी सांगलें. कार्यशाळेच्या समारोप सुवाळ्यांक समाज कल्याण मंत्री सुभाष फळदेसाय हाजीर राविल्ले. ही कार्यावळ आयोजीत केल्ले खातीर तांणी राज्य दिव्यांगजन आयोगाचें कवतूक केलें. तशेंच राज्य दिव्यांगजन आयुक्त कार्यालयाचे सचीव ताहा हाझीक ह्या वेळार हाजीर राविल्ले.

केल्ल्यो चुको फुडारांत परतून नाकाः मुरुगकर

इमारत, पूल, रस्तो, फुटपाथ, बसस्टॅण्ड, शौचालय वा दरेका मनशाचे गरजे खातीर गरजेच्या साधनसुविधांचेर काम करपी तंत्रीक सल्लागार, रचना विकासक हांचे मानसिकतेंत, वैचिरीक दिश्टीकोनांत सर्वसमावेशकतापूरक बदल घडोवन हाडपाचो यत्न ह्या कार्यशाळांतल्यान करतात. दिव्यांगत्व हें फक्त व्हीलचॅर वापरप्यां पुरतें मर्यादीत ना. कायद्या वरवीं 21 तरांचें दिव्यांगत्व मान्य केलां. दिव्यांगजनां खातीर वापरपाक सोप्यो आनी योग्य ना अश्यो मुळाव्यो सुविधा आनी येरादारी वेवस्था निर्माण करपाचें दायज आमचे कडेन आसात. फुडारांत ह्यो चुको जावच्यो न्हय आनी फुडले पिळगे खातीर वापरपाक सोप्यो, आडखळमुक्त मुळाव्यो सुविधांची निर्मिती करपाचो वेळ आतां आयला, अशें अभिजीत मुरुगकर हांणी सांगलें.