भांगरभूंय | प्रतिनिधी
पणजीः दिवाळे कडेन सुटयेचे सेगीत तीन दीस मेळिल्ल्यान गोंयच्यो दर्यादेगो पर्यटकांनी गच्च भरिल्ल्यो. पर्यटकांची जरी गर्दी आसली तरी फावो तसो अर्थीक फायदो ह्या वेळार जावंक ना, अश्यो कागाळी पर्यटन वेवसायीक करतात. जे पर्यटक गोंयांत आयल्यात ते पयशे मोडिनात. ताका लागून धंदो सामकोच सुक्यार पडला, अशें तांणी सांगलें.
दिवाळेची सुटी धरून शुक्रार सोडल्यार शेनवार आनी आयतार हे सुटयेचे दीस आशिल्ले. ह्या काळांत खुबश्या पर्यटकांनी गोंयांक भेट दिली. दिवाळेच्या दिसा तितली गर्दी नाशिल्ली. मात दिवाळे उपरांत सगळे कडेन पर्यटकांची गर्दी पळोवपाक मेळ्ळी. दर्यादेगांचेर पर्यटकांची रास आशिल्ली. रस्त्याचेर गाडयांच्यो रांको लागिल्ल्यो.
ह्या दिवाळेच्या सुटयेच्या काळांत पर्यटन मळार कितें फायदो जालो हे विशीं टीटीएजीचे अध्यक्ष जॅक सुखिजा हांकां विचारलें तेन्ना तांणी निर्शेवणी उक्तायली.
जे पर्यटक आयल्यात ते अपेक्षे प्रमाण उणे आसात. मात चडशे लोक दिवाळी उपरांत प्रवास करपाक पसंत करतात आनी आमकां आस्त आसा, येवपी १० दिसांनी पर्यटकां मदीं वाड जातली. फायव्ह स्टार हाॅटेलांनी इव्हेंट आनी वॅडींग कार्यावळी खूब उण्यो जाल्यात. जशीं लग्नां आदीं जातालीं तितलीं आतां जायनात, अशी खंत सुखिजा हांणी उक्तायली.
२०२३- २०२४ वर्सा स्थिती सारकी नासून लेगीत वेवसाय बरो चलिल्लो. फाटल्या वर्सा जी वाड आसली ती ह्या वर्सा ना. पूण ह्या वर्सा वेवसाय इतलोय वायट जावंक ना. गोंयांत येवपी फ्लायटी फुल्ल आसल्यो तशेंच तांचें दरय सगळ्यांक परवडपा सारकेंच आशिल्ले. आपल्यो गाडयो घेवन पर्यटक येतात. हातूंत नवीन कांय ना. फाटले वर्साचे तुळेंत विमानांत येवपी प्रवाश्यांचो आकडो उणो जावंक ना, अशी म्हायती सुखिजा हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
