भांगरभूंय | प्रतिनिधी
पणजीः दिवाडी फेरीबोटीच्या धक्या वयल्यान शेनवारा 11 जानेवारीक फांतोडेर 3 वरांच्या सुमाराक एक मोटार उदकांत गेली. ही घडणूक लक्षांत आयलें उपरांत थंय कुशीक आशिल्ल्या फेरीबोटींतल्या कर्मचाऱ्यांनी मजती खातीर लायफ डॅकेट आनी रेस्क्यू ट्यूब उदकांत उडयलो. हाका लागून ड्रायव्हराचो जीव वाटावलो.
मेळिल्ले म्हायती प्रमाण, दिवाडी फेरी धक्याचेर शर्मद शैलेश शिरोडकार आपले मारुती इग्नीस गाडयेंत बसून आशिल्लो. ताका न्हीद आयली. ताका फाटल्यान एक फेरी आसा असो भास जालो आनी ताणें न्हिदेंतूच रिव्हर्स गियर घाले. हाका लागून गाडी धक्या वयल्यान सरळ उदकांत गेली. ताका दिशिल्ले ते प्रमाण फाटल्यान फेरी नाशिल्लीच. गाडी उदकांत गेले उपरांत ड्रायव्हरान मजती खातीर आड्ड्यो मारपाक सुरवात केली. उपरांत हो प्रकार फेरीबोटी धक्यार पार्क आशिल्ल्या फेरीबोटीच्या कामगारांक लक्षांत आयलो तेन्ना लायफ जॅकेट आनी रेस्क्यू ट्यूब उदकांत उडयले. ताचे मजतीन ड्रायव्हरान उदकांतल्यान भायर सरून आपलो जीव वाटायलो. फांतोडेर सुमार 3.01 वरांचेर पोरणें गोंय उजो पालोवपी दळाक आनी पणजे मुख्यालयांतल्या बचाव पंगडाक हे घडणुकेची म्हायती दिली. ते उपरांत तांणी घडणुकेच्या सुवातेर धांव घेवन उदकांत पडि्डली गाडी भायर काडली. ह्या प्रकरणांत पणजी मुख्यालयांतल्या बचाव पंगडाचे समीर हजारे (लिडिंग फायर फायटर), सुरेंद्र कार्बोटकार (ड्रायव्हर-ऑपरेटर), संदीप नायक, राजेंद्र पेडणेंकार (दोगूय फायर फायटर) तशेंच पोरणें गोंय उजो पालोवपी दळाचे रोहिदास परब (सब ऑफिसर), सुनील जल्मी (लिडिंग फायर फायटर), संजय सतरकार (ड्रायव्हर-ऑपरेटर), दत्ता सिनारी, प्रितम कळंगुटकार, राजेश च्यारी, उद्देश गावस, काशीनाथ फोंडेकार (सगळे फायर फायटर) हांणी ही कामगिरी केल्या. उजो पालोवपी दळाच्या नोंदी प्रमाण हे घडणुकेंत गाडयेचें 50 हजारांचें लुकसाण जालां. पोरणें गोंय पुलीस ह्या प्रकरणाचो फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
