भांगरभूंय | प्रतिनिधी
दिवच्या प्राचीन निळो बावटो प्रमाणीत घोघला दर्यावेळेर आयोजीत केल्ल्या भारतांतले पयले भोव-खेळ दर्यावेळ सर्तींत मध्य प्रदेशाक वस्तादपण मेळ्ळें. तांकां सगल्यांत चड 18 पदकां मेळ्ळीं. तातूंत सात भांगरां पदकां आसलीं. ह्या उल्लेखनीय पराक्रमान मध्य प्रदेशाच्या पंगडान राज्या भितर खेळां प्रतिभेची खोलाय कितली आसा, तें दाखोवन दिलें.
महाराष्ट्रान 3 भांगरा पदकां सयत 14 पदकां मेळयलीं, जाल्यार तमिळनाडू, उत्तरखंड आनी यजमान दादरा, नगर हवेली, दिव आनी दमण हांणी दरेकी 12 पदकां मेळयलीं. आसामाक 8 पदकां मेळ्ळीं, तातूंतलीं 5 भांगरा पदकां. लक्षद्वीपान बीच सॉकरांत भांगरा पदक मेळयलें. बरी लढत जाल्ल्या फायनलींत तांणी महाराष्ट्राक 5- 4 अशी हार घाली.
4 ते 11 जानेवारी मेरेन 28 राज्यां आनी संघराज्यांतल्यान 205 मॅच अधिकाऱ्यांच्या आदारान 1404 खेळगडे (सगळे 21 वर्सां सकयले) विंगड विंगड प्रकारच्या खेळांत वांटेकार जाले. खेळांची रचणूक दर दिसा 2 सत्रांनी केल्ली. सकाळीं 8 वरांचेर सुरू जावन दनपारां सोंपपी सकाळचें सत्र आनी उपरांत दनपारां 3 वरांचेर सुरू जावपी दनपारचें सत्र. ह्या वेळापत्रकाक लागून फावो त्या हवामानात खेळगड्यांची कामगिरी चड बरी जालीच, पूण उमेदी प्रेक्षकांक एक गतिशील आनी आकर्शक खेळ पळोवपाचो अणभव मेळ्ळो.
केंद्रीय युवा वेव्हार आनी खेळां मंत्री अनुराग ठाकुर हांणी एक्स (ट्विटर) पोस्ट करून हे सर्तीक तेंको दिलो. “खेळगड्यांची उर्जा आनी दीवची सोबीतकाय हांणी केन्नाच नाशिल्लें जाळें विणलां जें सोबीत आसा. भारताच्या दर्यादेगांक नवी जीण हाडपाची प्रधानमंत्री नरेंद्र मोदीची दृश्टी आसा, तिका आतां खेळां मोडण मेळ्ळां. गुजरात दर्यादेगेर आशिल्ल्या दिव हांगा पयलेच खेपे दर्यादेगे वेले खेळ घडोवन हाडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
