दिवचल म्हाल राखपाचो भाजपाचो यत्न

भांगरभूंय | प्रतिनिधी

तिनूय आमदार सक्रीय; काँग्रेस, आरजीपी वतीन प्रचाराक गती

भांगरभूंय । प्रतिनिधी

दिवचलः उत्तर गोंय लोकसभा वेंचणुके खातीर दिवचल म्हालांतल्या दिवचल, मयें आनी सांखळी मतदारसंघांत प्रचाराचो नेट वाडत चल्ला. सेगीत सवे खेपे वेंचणूक लडोवपी श्रीपाद नायक हांकां म्हालान पांच खेपे नेमान आघाडी मेळोवन दिल्या. हे खेपेय ती आघाडी तिगोवन दवरचे खातीर म्हालांतले तिनूय आमदार नेटान वावर करतात.

सांखळे काँग्रेस पक्षान आपले सगळ्या फुडाऱ्यांक संघटीत करून कामाक गती दिल्या. विधानसभा वेंचणुकेंत जे तरेन तांणी भाजपाक टक्कर दिल्ली तशीच टक्कर दिवपाक ते येसस्वी जातले काय ना, तें वेंचणुके उपरांतूच स्पश्ट जातलें.

पन्ना मुखेली, बूथ मुखेली, विवीध मोर्चा आनी संघटन हांच्या माध्यमांतल्यान तांणी दरेका घरांत संपर्क पुराय केला. काँग्रेसीचे बाबतींत विचार केलो जाल्यार उमेदवार खलप हांचो प्रचार चालूच आसा. दोन दिसा आदींच सांखळे काँग्रेसीची जाहीर सभा जाली. तातूंत भाजपान केल्ले टिकेक जाप दितना म्हापसा अर्बन आनी हेर विशयांचेर स्पश्टीकरण दिलां.

आरजीपीचे मनोज परब हांणीय म्हालांत धांवत्यो भोंवड्यो करून लोकां कडेन संपर्क सादला. म्हादय, गोंयकारपण आनी हेर विशय घेवन ते लोकां कडेन वतना दिसतात.

सांखळी मतदारसंघांत मुख्यमंत्री डॉ. प्रमोद सावंत हांणी शिक्षणीक सुविधा, खूबश्यो मुळाव्यो सुविधा, सरकारी, निमसरकारी नोकऱ्यो उपलब्ध करून दिल्यात. दिवचल मतदारसंघांत खूबश्या उदरगतीच्या कामांक चालना मेळ्ळ्या. मयें मतदारसंघांत लेगीत आमदार प्रेमेंद्र शेट हांचो शेक आसा. ताका लागून सध्याच्या खिणाक तरी तिनूय मतदारसंघांत बाजपाक समाधान दिवपी येस मेळटलें, असो विस्वास मुख्यमंत्री आनी दोनूय आमदार उक्तायतात. दिवचल मतदारसंघांत अपक्ष आमदार डॉ. चंद्रकांत शेट्ये हांचो तेंको भाजपाक मेळ्ळा. ताका लागून ह्या मतदारसंघांत भाजपाची ताकद वाडल्या.

मयें मतदारसंघांतल्यान उण्यांत उणी 18 हजार मतां मेळोवपाचो भाजपाचो यत्न आसा. 2007 त जाल्ले विधानसभा वेंचणुके सावन दिवचल म्हालांत भाजपाचो शेक आसा. 2007 आनी 2027 त जाल्ले विधानसभा वेंचणुकेंत दिवचल सयत सांखळी आनी मयें मतदारसंघांत भाजपान बावटो हुबयिल्लो. 2012, 2022 त जाल्ले विधानसभा वेंचणुकेंत फक्त दिवचले भाजपाक मातसो मार बसलो. थंय अपक्ष उमेदवारांनी जैत जोडलें. 2009, 2014, 2019 त जाल्ल्या तिनूय लोकसभा वेंचणुकेंत दिवचल म्हालांत भाजप उमेदवाराक व्हड आघाडी मेळ्ळ्या.

म्हालांत विवीध राजकी फुडाऱ्यांचो प्रचार कोनसो बसकां पुरतो मर्यादीत आसलो तरीय भाजपान दरेका घरांत वचून केंद्राच्यो आनी राज्याच्यो येवजण्यो पावयल्यात. सांखळे काँग्रेस फुडारी प्रचारांत विवीध मुद्दे उपस्थीत करतात. दिवचल म्हालांत काँग्रेस आनी आरजीपीन म्हादयचो मुद्दो लावन धरला जाल्यार भाजपान उदरगत आनी ‘मोदींचो विस्वास अब की बार चारसो पार’ची घोशणा दिवन प्रचाराक गती दिल्या.

85 हजार 627 मतदार

दिवचल मतदारसंघांत 14 हजार 75 दादले जाल्यार 14,534 महिला मेळून 28 हजार 609 मतदार आसात. सांखळी मतदारसंघांत 13,651 दादले जाल्यार 69 हजार 945 महिला मतदार आसात. जाल्यार मयें मतदारसंघांत 14,164 दादले आनी 14,909 महिला मतदार मेळून 29 हजार 73 मतदार आसात. दिवचल म्हालांत वट्ट 85 हजार 627 मतदार आसात.