भांगरभूंय | प्रतिनिधी
नगराध्यक्ष कुंदन फळारीः चवथीच्या बाजारा खातीर विशेश वेवस्था
भांगरभूंय । प्रतिनिधी
दिवचलः दिवचल बाजारांत आयतार सावन दुचाकी, चारचाकी गाडयो व्हरपाक मेळच्यो नात. चवथीच्या बाजारा खातीर ही विशेश वेवस्था केल्या. लोकांनी पालिकेक आदार करचो, असो उलो नगराध्यक्ष कुंदन फळारी हांणी मारलो. ह्या वेळार मुख्याधिकारी कबीर शिरगांवकार हाजीर आशिल्ले.
सध्या वाहनांची व्हड प्रमाणांत कोंयडी जाता. दिसपट्टी येरादारेचे कोंयडेची समस्या उप्रासता. गाडयेकारांक गाडी पार्क करतले जाल्यार योग्य सुवातूच नाशिल्ल्यान येरादारी वेवस्था हाल्ल्या.
दिवचल पालिका येरादारी विभाग आनी नगरपालिका अधिकाऱ्यांनी येरादारी वेवस्थेचो आराखडो तयार केला. ते प्रमाण आयतार सावन चवथीचो माटोळी बाजार सुरू जाता. ताका लागून लोकांनी बाजारांत दुचाकी, चारचाकी व्हरची न्हय. बाजाराच्या भायर आंखून दिल्ले सुवातेंत गाडी दवरून पालिकेक आदार करचो, अशें फळारी हांणी सांगलें. दिवचल बायपास रस्तो, झांट्ये सभाघर वाठार, दिवचल पुला कुशीचो वाठार, मुख्य रस्तो वाठार अशे सुवातांचेर पार्किंगेची वेवस्था केल्या, अशेंय तांणी सांगलें. बाजारांत विक्रेत्यां खातीर बसपाक सुवातो आंखल्यात. आयतारच्यान माटेळीचें सामान विकपा खातीर येतलें. चवथी निमतान व्हड प्रमाणांत लोक खरेदी खातीर बाजारांत येतले. तांकां मेकळेपणान भोंवून खरेदी करपाक मेळची हे खातीर दिवचल बाजारांत गाडयो हाडपाक कांय दीस बंदी घातल्या, अशें मुख्याधिकारी कबीर शिरगांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
