भांगरभूंय | प्रतिनिधी
दिवचल: दिवचल पुलीस स्टेशनाच्या वाठारांत गस्त घालतना पुलिसांनी दोन दुबावीतांक धरले. हे दोगूय जाण अस्नोडेंच्या जंक्शना लागसार एके मोटरसायकलीन भोंवताले. तांणी कांय जाण्ट्या बायलांक आडावन तांकां फटोवपाचो यत्न केल्लो.
उपनिरीक्षक एस. कामत आनी पुलीस कॉन्स्टेबल दयेश खांडेपारकार हांणी तांकां आडावपाचो यत्न केलो. मात ते पळून वचपाचो यत्न करपाक लागले. पुलिसांनी तांचो फाटलाव केलो आनी तांकां अटक केली. तांचे कडल्यान बनावट पुलीस आय कार्ड, फेस मास्क, फांतर आनी कंवचेचीं कांकणां सांपडलीं. तांचे कडेन आशिल्ली मोटरसायकल चोरयेची आशिल्ल्याचो दुबाव आसा.
आरोपींनी चवकशेंत आपली वळख गुलाम शिराज अब्बास शिराज (४० वर्ष, मोराज, सांगली, महाराष्ट्र) आनी असदुल्ला अफजल अली (३५ वर्ष, बीदर, कर्नाटक) अशी दिल्या. तांणी २० डिसेंबर २०२५ दिसा दिवचले एके बायलेक फटोवन तिचें मंगलसूत्र चोरपाचो गुन्यांव कबूल केलो.
आरोपींक ७ जानेवारी २०२६ दिसा १६:४८ वरांचेर अटक केली. ह्या प्रकरणांत पीएसआय एस. कामत हांच्या नेतृत्वा खाला तपास सुरू आसा. ह्या गुन्यांवाचो तपास पुलीस अधीक्षक (उत्तर) हरिश्चंद्र व्ही. मडकयकार हांच्या मार्गदर्शना खाला सुरू आसा. विजय राणे आनी पंगड फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
