भांगरभूंय | प्रतिनिधी
दिवचल, प्रतिनिधी ः नेण्टे चलयेचें अपहरण करून अत्याचार केल्ल्या प्रकरणांत दिवचले पुलिसांनी तमिळनाडूच्या एका मनशाक अटक केल्या.
उपअधीक्षक जीवबा दळवी हांणी दिल्ले म्हायती प्रमाण, चलयेच्या बापायन मे 2024 वर्सा आरोपी नवीनकुमार गौंडर (तामिळनाडू) हाणें आपले 17 वर्सां पिरायेचे चलयेचें अपहरण केलें अशी कागाळ केल्ली. उपरांत पुलिसांनी रोखडोच हे संबंदी गुन्यांव नोंद करून चवकशी सुरू केली. गुन्यांव केले उपरांत दुबावीत पिडित चलये वांगडा फरारी आशिल्लो.
चलयेचो आनी आरोपीचो सोद घेवपा खातीर दिवचलचे उपनिरिक्षक जयप्रकाश जाणकार, हवालदार मयूर आसुलकार आनी अश्विनी गांवकार हांचो आस्पाव आशिल्लो पुलीस पंगड तयार केलो. ते उपरांत तंत्रीक पळोवणी, गुप्तचर प्रणाली आनी हेर साधनांचो वापर करून पिडित चलयेक तमिळनाडूंतल्या रासीपुरमांत नवीनकुमार मणी गौंडर (26, तिरुचेंगोडे, तामिळनाडू) हाचे वांगडा सोदून काडलें आनी गोंयांत हाडलें.
आयपीसी कलम 363 आनी गोंय बाल कायद्याचे कलम 8, बीएनएसचे कलम 64 (2) (i) आनी पोक्सो कायद्याचे कलम 4 आनी 6 खाला गुन्यांव नोंद केलो. एनजीओ मुखार जबाब नोंद करून वैजकी तपासणी केले उपरांत पिडित नेण्टे चलयेक अपना घरांत दाखल केले. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
