दिवचल, केप्यां, काणकोणां चलयांची जल्म नोंदणी अदीक

भांगरभूंय | प्रतिनिधी

पणजी : गोंयांत 1 जानेवारी 2023 ते 31 जानेवारी 2026 ह्या काळांत 52 हजार 644 भुरग्यांच्या जल्माची नोंदणी जाल्या. तातूंत 26 हजार 919 चले जाल्यार 25 हजार 725 चलयांचो आस्पाव आसा. चडश्या म्हालांनी चलयांचे तुळेंत चल्यांचे जल्म नोंदणीचें प्रमाण चड आसा. अशें आसलें तरीय दिवचल, केपें आनी काणकोण म्हालांत मात चल्यां परस चलयांच्या जल्माची नोंदणी अदीक आसा. बार्देस म्हालांत चले आनी चलयांच्या जल्माचे नोंदणींतलो फरक सगल्यांत चड आसा, जाल्यार पेडणें म्हालांत हो फरक सगल्यांत उणो आसा.

मेळिल्ले म्हायती प्रमाण, वयल्या काळांत दिवचल म्हालांत 605 चले जाल्यार 609 चलयांच्या जल्माची नोंदणी जाल्या. केपें म्हालांत 523 डले आनी 529 चलयांची जाल्यार काणकोण म्हालांत 41 चले आनी 45 चलयांच्या जल्माची नोंदणी जाल्या. पेडणें म्हालांत 115 चले आनी 109 चलयो, सत्तरींत 92 चले आनी 85 चलयो, सांग्यार 37 चले आनी 30 चलयो, धारबांदोड्यां 32 चले आनी 24 चलयो जाल्यार फोंडें म्हालांत 2766 चले आनी 2670 चलयांच्या जल्माची नोंदणी जाल्या.

तीन वर्सांत बार्देस म्हालांत 5946 चले आनी 5509 चलयांच्या जल्माची नोंदणी जाली. दोनूय लिंगांचे नोंदणींतलो फरक 440 इतलो आशिल्लो. तिसवाडी म्हालांत हो फरक 424, साश्टींत 171 जाल्यार मुरगांव म्हालांत 52 इतलो आशिल्लो.

गोंयांत वयल्या काळांत 47 हजार 568 जाणांच्या मरणांची नोंदणी जाल्या. तातूंत 27 हजार 656 दादले आनी 19 हजार 912 बायलां आशिल्लीं. तिसवाडी म्हालांत सगल्यांत चड 18 हजार 246 जाणांच्या मरणाची नोंदणी जाली. तातूंत 11 हजार दादले जाल्यार 6737 बायलां आशिल्लीं.

गोंयभरांत 206 केंद्रां

जल्म आनी मरणाची नोंदणी वेळार करपाक मेळची हे खातीर गोंयभरांत 206 नोंदणी केंद्रां सुरू केल्यांत ग्रामपंचायत, नगरपालिका, म्हानगरपालिका, जीएमसींत जल्म आनी मरणाची नोंदणी करपाक मेळटा. ते भायर सगल्या खाजगी आनी सरकारी हॉस्पिटलांक तांच्या हॉस्पिटलांतले जल्म आनी मरणाची म्हायती 21 दिसां भितर दिवप गरजेची आसा.

लींग गुणोत्तरांत वाड

फाटल्या 10 वर्सांच्या काळांत गोंयांत निकत्याच जल्माक आयिल्ल्या भुरग्यांच्या लींग गुणोत्तरांत वाड जाल्या. 2015 त गोंयांत दर हजार भुरग्यांच्या जल्मा फाटल्यान 936 चलयांचो जल्म जाल्लो. 2025 त दर हजार चल्यांच्या जल्मा फाटल्यान 977 चलयांचो जल्म जालो.