भांगरभूंय | प्रतिनिधी
भांगरभूंय । प्रतिनिधी
दिवचलः दिवचल आनी साखळी पालिका वाठारांत पावसा पयलींचीं काम सध्या नेटान सुरू आसात. दिवचले गटारां नितळ करपाचे काम तशेंच कांय कडेन व्हाळांतलो चिखोल काडपाचीं कामां हातांत घेतल्यांत अशें दिवचलचो नगराध्यक्ष कुंदन फळारीन सांगलें.
दिवचले कांय कडेन गटारांत घाणयारें उदक सोडटात अशें दिसून आयलां. पावसाच्या दिसांत दिवचलच्या कांय वाठारांतले रस्ते उदका खाला वतात. ते खातीर गटरां नितळ करपाचेर चड लक्ष दिलां. लोक गटारांनी प्लास्टिक बाटल्यो आनी हेर कोयर वडयतात. ताका लागून ते तुंबून उदक रस्त्यार येता. हे विशीं पालिका मंडळ आनी खर भूमिका घेतलें. जमनीपोंदच्यान वीज केबल्स घालपा खातीर फोडल्ले रस्ते पावसा पयलीं पुरयतले अशें फळारीन सांगलें.
दिवचल तालुक्याचो उपजिल्होधिकारी आनी मामलेदारान आपातकालीन यंत्रणा तयार दवोरपा विशीं बसका घेतल्यात. लोकांक मजत करपा खातीर नियंत्रण कक्ष सुरू करतले. पावसाच्या दिसांनी लोकांक त्रास जावचो ना हें पळोवपाची जापसालदारी पालिका मंडळ आनी पंचायतीक दिल्या अशी म्हायती दिवचलचो आमदार डॉ चंद्रकांत शेट्ये हाणे दिली. साळ आनी हेर वाठारांत पावसाच्या दिसांनी हुंवार येवचो न्हय हे खातीर तिळारी धरण अधिकारी आनी थळाव्या अधिकाऱ्यांची जोड बसक घेतले अशें तांणी सांगलें.
साखळे पालिका वाठारांत वाळवंटी, सुपाची पूड आनी हेर वाठारांतलो चिखोल काडपाचें काम सुरू केलां अशी म्हायती नगराध्यक्ष रश्मी देसाय आनी मुख्याधिकारी कबीर शिरगांवकारान दिली. साखळे बाजारांत हुंवाराचें उदक रिगचें न्हय हे खातीर उदका स्रोत खात्यान पंपीक यंत्रण सक्रिय केल्या तशेंच वाळवंटीक जोडपी व्हाळ नितळ केल्यात अशें तांणी सांगलें.
पावसा पयलीं जाय तीं सगळी कामां पुराय करून आपत्कालीन यंत्रणा सक्षक करपाची सूचोवणी मुख्यमंत्री डॉ प्रमोद सावंत हाणे जिल्होधिकारी, मामलेदार आनी संबंदीत अधिकाऱ्यांक दिल्यात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
