भांगरभूंय | प्रतिनिधी
दिवचल: दिवचल भौशीक गणेशोत्सव मंडळान आयोजीत केल्ल्या आनी तरणाटे उद्देजक आनी समाजसेवक सुशांत पेडणेंकार हांणी पुरस्कृत केल्ल्या अखील गोंय वेशभुशा सर्तीच्या ‘अ’ गटांतले पयलें इनाम अनन्या परब हिका जाल्यार ‘ब’ गटांतलें पयलें इनाम तनुश्री वाडीकार हांकां फावो जालें.
दिवचल भौशीक गणेशोत्सव मंडळाच्या माटवांत बुधवारा सांजवेळा घेतिल्ले ह्या सर्तींतले हेर जैतिवंत सकयल दिल्ले प्रमाण.
अ गट: दुसरें इनाम- अनया गांवस, तिसरें- ओवी प्रभू गांवकार. नव्या गांवस आनी हर्ष अवखळे हांकां उमेद वाडोवपी इनामां भेटयलीं.
‘ब’ गटांतलें दुसरें इनाम विहम पेडणेंकार, तिसरे विशाल नायक जाल्यार आरोही वेरेंककर आनी कनिष्का वायंगणकार हांकां उमेद वाडोवपी इनामां भेटयलीं.
सर्तीचें परिक्षण निशा पोकळे, प्रा. विठ्ठल वेर्णेंकार हांणी केलें. इनामां भेटवण सुवाळ्यांत सुशांत पेडणेंकार मुखेल सोयरे म्हूण हाजीर आशिल्ले. जैतिवंतांचे अभिनंदन करतनाच सुशांत पेडणेंकार हांणी सर्ती खातीर भुरग्यां कडल्यान तयारी करून घेवपी पालक आनी तांकां माची मेळोवन दिवपी मंडळ हांचें अभिनंदन करून सगल्यांक शुभेत्सा दिल्यो.
निशा पोकळे, प्रा. दिलीप धारगळकार हांणीय आपले विचार उक्तावन सगल्यांचें अभिनंदन केलें. मंडळाचे अध्यक्ष प्रसाद नाटेकार हांणी येवकार दिलो. मंडळाचे सचीव तुळशीदास परब, प्रा. दिलीप धारगळकार, गौरव बांदेकार बी मानेस्त माचयेर हाजीर आशिल्ले. सुत्रसंचालन नरेश कडकडे हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
