भांगरभूंय | प्रतिनिधी
पंचनामे करपाचे मुख्यमंत्र्याचे आदेश, नियाळ घेवपाक सुरवात
भांगरभूंय । प्रतिनिधी
दिवचल : दिवचल म्हालांत कांय दिसां सावन पडपी घोग्यांनी पावसाक लागून म्हालांतल्या चडश्या वाठारांतलीं शेतां पुराय काबार जावपाच्या मार्गार आसात. शेतांत उदक भरिल्ल्यान लुवणेक तयार आशिल्लें पीक आडवे पडून कणसाक कोंब आयल्यात. ताका लागून शेतकारांचे हाता कडेन आयिल्ल्या पिकाची पावसान वाट लायली, अश्यो प्रतिक्रिया म्हालांत आयकुपाक येतात.
म्हालांतल्या साळ, लाटंबार्से, मयें, आमोणें, न्हावेली, नार्वे तशेंच मेणकुरें वाठारांतल्या खूबश्या शेतांचें व्हड प्रमाणांत लुकसाण जालां. सरकारान ताकतिकेची मजत करून आदार करचो, अशी मागणी मेघश्याम राऊत, खेमलो सावंत, संतोशकुमार सावंत तशेंच हेर शेतकारांनी केल्या.
दिवचल म्हालांतल्या शेतकारांचें व्हड प्रमाणांत लुकसाण जालां. ह्या वाठारांनी अंदूं शेतां बरी पिकिल्लीं, मात पावसान घात मारलो. शेतांत आडवीं पडिल्ल्या पिकांक कोंब आयिल्ल्यान पुराय शेतां काबार जावपाच्या मार्गार आसात, अशें गोवा फॉरवर्डाचे संतोषकुमार सावंत हांणी मयेंच्या शेतांची पलोवणी केले उपरांत सांगलें. तशेंच शेतकारांक ताकतिकेन अर्थीक मजत करची, अशी मागणी केल्या.
सखाराम पेडणेंकार तशेंच गोवा किसान मोर्चा अध्यक्ष विश्वास चोडणकार, दिवचल म्हाल फार्मर्स संघटणेचे अध्यक्ष विश्वंभर गांवस, विवीध सरपंच, पंचायत मंडळांनी शेतांचे जाल्ले लुकसाणे खातीर सरकारान मजत करची, असो उलो मारला.
मुख्यमंत्री डॉ. प्रमोद सावंत हांणी शेतकी खात्या वतीन शेतांचे लुकसाणेचो नियाळ घेवपाचे आदेश दिले उपरांत दिवचल विभागीय शेतकी खात्यान अधिकारी आनी कर्मचाऱ्यां वांगडा म्हालांतल्या विवीध वाठारांतल्या शेतांनी वचून शेतांचो नियाळ गेवन लुकसाणेचो अहवाल तयार करपाक सुरवात केल्या, अशी म्हायती शेतकी अधिकाऱ्यांनी दिली.
मुख्यमंत्री डॉ. सावंत हांणी चार दिसां आदींच गोंयांतल्या विवीध वाठारांत शेतांचें लुकसाण जाल्ल्याची खबर मेळटाच शेतकी खात्याक पुराय अहवाल तयार करपाचे आदेश दिल्ले. तशेंच तलाठ्या वतीन गांवागांवांतल्या शेतांचो नियाळ घेवन शेतकी अधिकारी आनी तलाठ्या वतीन लुकसाणेचो अहवाल सादर करपाचे आदेश दिल्ल्यात, अशें मुख्यमंत्र्यान सांगिल्लें. ते प्रमाण शेतकी खात्यान आपलें काम सुरू केलां, अशें शेतकी अधिकाऱ्यांनी स्पश्ट केलें.
मजगतीं, आडवेळ्या पावसाक लागून भात शेती वांगडाच कुळागरां पुराय धोक्यांत आयल्यात. सुपारीचें पीक पुराय काबार जावपाचो भंय बागायतदारांनी उक्तायला.
दिवचलचे आमदार डॉ. चंद्रकांत शेट्ये हांणी लेगीत शेतकारांक सगले तरेची मजत मेळोवन दिवचे खातीर फाटपुरवण करतात, अशें सांगलें. आमदार प्रेमेंद्र शेट हांणी लेगीत मयें वाठारांत शेतांचें लुकसाण जाल्ल्यान फाटपुरवण करून सरकारा वतीन आदार करतले, अशें स्पश्ट केल्लें. खूब कडेन केळमे आडवे जाल्ल्यान लोकांक लुकसाण सोंसचें पडला. शेतांत उदक भरिल्ल्यान शेतांचेर व्हड परिणाम जाला. आमोणेंचीं शेतां काबार जाल्यात, अशें खेमलो सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
