भांगरभूंय | प्रतिनिधी
दिवचल: फाटल्या जायत्या म्हयन्यां सावन दिवचले- धबधबो हांगा भोंवपी बिबटो निमाणो रातीं सुमार ११:३० वरांचेर रान खात्याच्या पांजर्यांत आडकलो. उपरांत रान खात्याच्या अधिकार्यांनी थंय येवन बिबट्याचो पांजरो सारको केलो. सोमारा ताका सैमीक वाठारांत सोडिल्ल्याची म्हायती रान खात्याचे विभागीय रान अधिकारी सेबेस्तीयन रॉड्रिग्ज हांणी दिली.
फाटले जायते म्हयने धबधबो हांगा भोंवपी बिबट्याक धरपा खातीर लोकांचे मागणे प्रमाण पांजरो लायिल्लो. त्या बिबट्यान जायते सुणे आनी पाडकुल्यांची शिकार केल्ली. तशेंच तो सेगीत लोकवस्तींत दिसतालो. आयतारा रातच्या सुमार इकरा-साडे इकरा वरांचेर बिबटो पांजर्यांत सांपडलो. उपरांत हे विशीं थळाव्यांनी रान विभागाक म्हायती दिली.
रान अधिकारी सेबेस्तीयन रॉड्रिग्ज हांच्या मार्गदर्शना खाला रान विभागाचे रश्मीन मुळगांवकार, पुंडलिक कळंगुटकार, राज मळीक, बंडू राणे, विष्णू राणे, विश्रांत नायक हे टिमीन घडणुके सुवातेर धांव घेतली. उपरांत बिबट्याक व्हरून ताका सैमीक वाठारांत सोडलो.
कांय दिसां पयलीं साष्टीवाडो, बोड्ड्यां प्रशांत चणेकार हांच्या घरा सामकारच्या रस्त्यार एका बिबट्याक वाहनाचो धपको बशिल्ल्यान तो जखमी जाल्लो. तीन दिसां पयलीं तो बिबटो रस्तो क्रॉस करतना दिशिल्लो. हाका लागून मुळगांव, व्हाळशी, बोड्डें, दिवचल शार, धबधबो, सारमानस, सर्वण ह्या पुराय वाठारांत बिबट्यांचो वावर सुरू आसा, असो दुबाव लोकांनी उक्तायला. ताका लागून रान खात्यान कांय वाठारांनी कॅमेरा ट्रॅप लायल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
