भांगरभूंय | प्रतिनिधी
-थळाव्या लोकां कडल्यान बरो प्रतिसाद; 253 जाणांची मुफत तपासणीपणजी/दिवचलः गोंय वैजकी म्हाविद्यालय (गोमॅकॉ), दांत म्हाविद्यालय आनी दिवचल मुळाव्या भलायकी केंद्रान शेनवारा दिवचले आयोजीत केल्ल्या कॅन्सराचें तपासणी मोहिमेंत दोगां जाणांक कॅन्सर जाल्यार स जाणांक कॅन्सरा पयलींच्या पांवड्यार आशिल्ल्याचे स्पश्ट जाले. गोमेको कम्युनिटी विभाग मुखेली आनी मोहिमेचे नोडल अधिकारी डॉ. जगदीश काकोडकार हांणी आमच्या प्रतिनिधी कडेन उलयतना ही म्हायती दिली.
हे मोहिमेक लागून शेनवारा दिवचले 253 जाणांची तपासणी जाली. तातूंत 76 दादले आनी 177 बायलांचो आस्पाव आशिल्लो. तातूंतल्या एकल्याक स्तनाचो कॅन्सर आनी एकल्याक स्वादुपिंडाचो कॅन्सर जाल्ल्याचें निदान जालें. आतां मेरेन ह्या मोहिमेंत मेळिल्लो हो पयलो स्वादुपिंडाच्या कॅन्सराचो दुयेंती. हाचे भायर स जाण कॅन्सरा पयलींच्या पांवड्यार आशिल्ल्याचें दिसून आयलें, अशें डॉ. काकोडकार हांणी सांगलें.
मजगतीं, नगराध्यक्ष कंदन फळारी, कारापूर -सर्वणचे सरपंच तन्वी सावंत, डॉ. जगदीश काकोडकार, डॉ. उत्तम देसाय, डॉ. नवीन शिरोडकार, डॉ. उमेश कामत, डॉ. गीता देशमुख, डॉ. नीलेश फिग्दोरियो, डॉ. वैष्णवी चणेकार आदींच्या उपस्थितीत शिबिराचें उक्तावण जाले.
गांवगिऱ्या वाठारांत वचून मुफत कॅन्सर तपासणीचो हो उपक्रम तोखणायेचो आसा. ह्या शिबिराचो लोकांक व्हड फायदो मेळिल्ल्याचे कुंदन फळारी हांणी सांगलें.
बायलां आनी दादल्यांनी मुळाव्या पांवड्यारूच कॅन्सर तपासणी केल्यार असाध्य दुयेंसांचेर नियंत्रण दवरप शक्य अाशिल्ल्याचे तन्वी सावंत हांणी सांगलें. जाल्यार भलायकी क्षेत्रांत दर्जेदार सेवा दिवपांत गोंय देशांत आघाडेर आसा. मोबायल व्हॅनच्या माध्यमांतल्यान गांवागांवांत वचून मुफत कॅन्सर तपासणी करपी गोंय हे पयलेच राज्य आशिल्ल्याचे डॉ. काकोडकार हांणी स्पश्ट केले.
………………………..
31 जाणांचे जीव वाटवापांक येस
आतां मेरेन मंडूर, वाळपय, कुडचडें, सांखळी, काणकोण, पोरणें गोंय, कुडतरी आनी दिवचल अशा आठ सुवातींनी मुफत कॅन्सर तपासणी मोहीम चलयल्या. वट्ट 1,734 जाणांची मुफत चांचणी जाली. आठ जाणांक कॅन्सर जाल्ल्याचें स्पश्ट जालां, जाल्यार 23 जाण कॅन्सरा पयलींच्या पांवड्यार आसात. हे मोहिमेक लागून आतां मेरेन 31 जाणांक बेगोबेग उपचार मेळ्ळ्यात आनी तांचो जीव वाटावला अशें डॉ. जगदीश काकोडकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
