भांगरभूंय | प्रतिनिधी
दिवचले : दिवचल वाठारांतल्या नायक नगरांत उदकाच्या व्हड पायप बदलपाचें काम चालू आसा. हें काम सुरू आसतनाच तीन फावटीं उदकाचें पायप फुटून गळती जाल्ल्यान फाटल्या तीन दिसां सावन दिवचल आनी सरभोंवतणच्या नागरिकांक उदकाक लागून बरेच त्रास सोंसचे पडटात.
उदका खातीर लोकां बांयों, तशेंच टँकराच्या उदकाची मजत घेवची पडटा. खुबश्या आस्थापनांत चार-पांच मजली इमारती आशिल्ल्यान अश्या सुवातांवेल्या लोकांचेर उदका खातीर तळमळपाची पाळी आयल्या. कांय थारावीक वाड्यांचेर टँकर येतात. मात हेर लोकांक ताचो फायदो मेळना, अशें कांय नागरिकांनी सांगलें.
उदका पुरवण खात्यान, उदकाच्या पायपांचें दुरुस्ती काम करपाचें आशिल्ल्यान दोन दीस उदक उपलब्ध आसचें ना, अशी नोटीस जारी केल्ली. हे गजाली दोन दीस जावन गेले आनी आतां तिसरो दीस सोंपत आयला तरी उदक मेळूंक नाशिल्ल्यान लोकांनी तिडक उक्तायल्या. काम शेनवारा सोंपून आयतारा उदक मेळपाचें आशिल्लें. मात तें मेळूंक ना, अशेंय नागरिकांनी सांगलें.
दिवचलचे आमदार डॉ. चंद्रकांत शेटये हांणी सांगलें, जल खात्याक बेगीनचू दुरुस्तीचें काम करपाचे आदेश दिल्ले. आयज सकाळीं काम सुरू आशिल्ल्या वाठारांत वचून तांणी तपासणीय केल्ली. हे विशीं कांय नागरिकांनी ह्या कामाक कळाव जाल्ल्यान तिडक उक्तायली.
ह्या वेळार डॉ. शेटये हांणी लोकांक जो त्रास सोंसचो पडलो ते विशीं चिंता उक्तायली. तशेंच आयतारा रातची उदकाची पुरवण सुरळीत जातली अशेंय सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
