भांगरभूंय | प्रतिनिधी
दिवचल : दिवचले – बोड्ड्यां नाईक नगरांत संजय म्हापशेंकार आनी तांचो पूत संचीत हांची कूड घरांत सांपडिल्ल्यान खवदळ पडला. घरांत 12 पानांची एक चीट सांपडल्या. पुलिसांनी दोगांयची कूड जीएमसींत पोस्ट मॉर्टेमा खातीर धाडल्या. रिपोर्ट आयल्या उपरांत मरणाचें कारण कळटलें.
सोमारा रातीं संजयाची धूव कामावेल्यान घरा आयली तेन्ना दोगूय थंड पडिल्लें ताका दिश्टी पडले. संचीत खाटीर आशिल्लो, ताच्या तोंडाक मार लागिल्लो, तोंडांतल्यान रगत येताले. जाल्यार ताचो बापूय संजय जमनीर आशिल्लो. तांच्या तोंडांतल्यान फेस येतालो.
पुलिसांक सांपडिल्ल्या चीटयेंत कितें बरयला तें कळूंक शकले ना. पुलीस सगल्या आंगानी तपास करतात.
संजयाची धूव कामावेल्यान आयली तेन्ना घरांतली परिस्थिती पळोवन ताणें मामाक फोन केलो. दिवचल पुलिसांक म्हायती मेळटाच तांणी घडणूक थळार धांव मारली. 108 अॅंबुलन्सूय पावली. वैजकी कर्मचाऱ्यांनी दोगांकूय तपासल्या उपरांत दोगांकूय मरण आयलें म्हूण तांणी पुश्टी केली. फॉरेन्सीक पंगडाकूय आपयल्लें.
पुलीस निरिक्षक विजय राणे हांच्या मार्गदर्शना खाला पुलीस उपनिरिक्षक आनी पुलीस पंगड फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
