भांगरभूंय | प्रतिनिधी
पणजी : राज्यांत १ जानेवारी २०२३ ते ३१ जानेवारी २०२६ ह्या काळांत ५२ हजार ६४४ बालकांच्या जल्माची नोंदणी जाल्या. हातूंत २६ हजार ९१९ चले, जाल्यार २५ हजार ७२५ चलयांचो आसपाव आसा. चडश्या म्हालांनी चलयांच्या तुळेंत चल्यांचे जल्म नोंदणेचें प्रमाण चड आसा. अशें जरी आसलें तरी दिवचल, केपें आनी काणकोण म्हालांत मात चल्यां परस चलयांची जल्माची नोंद चड आसा.बार्देस म्हालांत चले आनी चलयांच्या जल्माच्या नोंदणेंत सगल्यांत चड फरक आसा. जाल्यार पेडण्यां हो फरक सगल्यांत उणो आसा.
मेळिल्ले म्हायती प्रमाण, वयल्या काळांत दिवचल म्हालांत ६०५ चले जाल्यार ६०९ चलयांच्या जल्माची नोंदणी आसा. केपें म्हालांत ५२३ चले आनी ५२९ चलयो, जाल्यार काणकोण म्हालांत ४१ चले आनी ४५ मुल चलयांच्या जल्माची नोंदणी जाल्या. पेडण्यां ११५ चले आनी १०९ चलयां, सत्तरी ९२चले आनी ८५ चलयो, सांग्यार ३७ चले आनी ३० चलयो, धारबांदोड्यां ३२ चले आनी २४ चलयांची आनी फोंडें म्हालांत २७६६ चले आनी २६७० चलयांच्या जल्माची नोंदणी आसा.
तीन वर्सांनी बार्देसांत ५९४६ चले आनी ५५०९ चलयांची जल्माची नोंद जाली. दोनूय लिंगांच्या नोंदणेंत ४४० इतलो फरक आशिल्लो. तिसवाडी हो फरक ४२४, सासश्टींत १७१, जाल्यार मुरगांवां ५२ इतलो फरक आशिल्लो.
राज्यांत वयल्या काळांत ४७ हजार ५६८ जाणांच्या मरणाची नोंद जाल्या. हातूंत २७ हजार ६५६ दादले आनी १९ हजार ९१२ बायलो आशिल्ल्यो. तिसवाडी म्हालांत सगल्यांत चड १८ हजार २४६ जाणांच्या मरणांची नोंद जाली. हातूंत ११ हजार ५०९ दादले जाल्यार ६७३७ बायलो आशिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
