भांगरभूंय | प्रतिनिधी
दिवचलः दिवचल ते म्हापशें म्हामार्गार बोड्डा दिवचले दीनदयाळ सुपर मार्केटा मुखार दोन दुचाकीं मदीं जाल्ल्या अपघातांत कुमारवाडो मयेंचो उदय विलास शेट (30) हाका सुवातेचेरूच मरण आयलें. रस्त्याक तकली आपटिल्ल्यान ताका सुवातेचेरीच मरण आयलें. दिवचल सरकारी समाजीक भलायकी केंद्राक ताका व्हेलो, पूण थंय ताका मरण आयिल्ल्याचे घोशीत केलें.
हो अपघात शुक्रारा 30 ऑगस्टाक सांजेच्या 5.20 वरांच्या सुमाराक जालो. उदय शेट एक्टिव्हा स्कुटरीन (जीए 04 आर 4992) वयल्यान मुळगांवचे दिशेन धोफरायत वतालो. ताणें मुळगांवचेच दिशेन वचपी मोटरसायकलीक (जीए 03 एल 5703) फाटल्यांतल्यान नेटाचो धपको मारलो. ह्या धपक्यान उदय मोटरसायकली वयल्यान उसळून रस्त्यार पडलो. ह्या वेळार ताची तकली फाटल्यान रस्त्याचेर आपटली. ताची तकली फुटून नाका- तोंडांतल्यान खूब रगत व्हांवपाक लागलें. थंय आशिल्ल्या लोकांनी ताकतिकेन 108 अॅम्ब्युलन्सीक कडेन संपर्क केलो, पूण दिवचलची अॅम्ब्युलन्स दुसरे कडेन गेल्ल्यान कासारपालच्यान अॅम्ब्युलन्सीक आपयली. ह्या वेळार उदयान हॅल्मेट घालूंक नाशिल्लें.
ह्या धपक्यान अस्नोडेंचो मोटरसायकल चालक लेगीत उसळून रस्त्यार पडलो. पूण ताणें हॅल्मेट घातिल्ल्यान तो वाटावलो. अपघाताची म्हायती मेळटाच दिवचल येरादारी पुलीस विभागाचे पुलीस घडणुकेचे सुवातेर आयले आनी तांणी येरादारी सुरळीत करचे खातीर मजत केली. ते उपरांत पुलीस आयले आनी तांणी अपघाताचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
