भांगरभूंय | प्रतिनिधी
कामाक सुरवात; 25 लाख रुपया जातले खर्च
भांगरभूंय । प्रतिनिधी
दिवचलः वखदी गुणधर्म आशिल्ले आनी बाराय म्हयने व्हांवपी नागझरवाडो दिवचलेच्या नागझर वाठाराचें सोबितीकरण तशेंच कुशीक गणपती पावोवपा खातीर सोपो बांदपाच्या कामाक आमदार डॉ. चंद्रकांत शेट्ये हांचे हस्तुकीं सुरवात जाली. ह्या वेळार थळावी नगरसेविका अपर्णा फोगेरी, उद्देदक कुंदन फोगेरी, नगरसेविका रंजना वायंगणकार, डॉ. माधव लेले, कृष्णनाथ फोगेरी, बाबू गोवेकार हाजीर आशिल्ले.
आमदार शेट्ये हांणी सांगलें, थळाव्या लोकांनी उदरगतीचे प्रक्रियेंत वांटेकार जातना आपली जमीन दिली तशेंच ना हरकत दाखले दिले जाल्यार कसलीच उदरगत आडखळून उरपची ना. थळावे जमीनदार विजय सरदेसाय आनी कुटुंबान ही जमीन दिल्ल्यान ह्या वाठाराचें सोबितीकरणाचें काम शक्य जालें. अशे तरेन मतदारसंघांत खूबशे प्रकल्प हातांत घेतले, अशें आमदार डॉ. शेट्ये हांणी सांगलें.
नागझर वाठारांत टायल्स बसोवप, वाठाराचें सोबितीकरण करप, गणपती पावोवपाक सोपो आनी शेड बांदप ह्या कामा खातीर 25 लाख रुपया खर्च येतलो. बेगिनात बेगीन काम पुराय करतले, अशी म्हायती अपर्णा फोगेरी हांणी दिली. कुंदन फोगेरी हांणी सांगलें, ह्या वाठारांतल्या नागझर ह्या सैमीक झऱ्याच्या वाठाराचें सोबितीकरण जाता. लोकांक ताचो बरो उपेग जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
