भांगरभूंय | प्रतिनिधी
मानकर : नोकर भरती मेळाव्यांत 317 उमेदवार, 84 जाणांक थंयच्या थंयच नियुक्ती पत्रां
भांगरभूंय | प्रतिनिधी
दिवचल : “सुरवाती सावन हांव तरणाटे पिळगेच्या आनी बायलांच्या पर्जळीत फुडाराचेर लक्ष केंद्रीत करून काम करतां, आनी हे फाटभुंयेर दिवचल मतदारसंघांतली बेरोजगारी उणी करपा खातीर ठोस आनी प्रामाणीक यत्न करप हें आमचें खातीर प्राधान्य आसा. तरणाट्यांक तांच्या तांकी प्रमाण संद मेळची हे खातीर ‘नवचैतन्य युवा पर्व’ ह्या उपक्रमा खाला व्हड रोजगार मेळावो आयोजीत केला, अशें उद्देजक आनी समाजसेवका चैतन्य (सनी) मानकर हांणी सांगलें.
आयतारा दिवचल – बोड्ड्यां आयोजीत केल्ल्या रोजगार मेळाव्यांत ते उलयताले. मेळाव्याचें उक्तावण ज्येश्ठ नागरीक सुचिता परब हांणी केलें. ह्या वेळार मानकर हांचे समर्थक संदीप पेडणेंकार, चैतन्य पाटील आनी अनिकेत ढोबळे तशेंच हेर मानेस्त हाजीर आशिल्ले.
ह्या रोजगार मेळाव्यांत विवीध फार्मास्युटिकल्स कंपन्यो, महिंद्रा, जिनो, युनिकॅम, क्रॉम्प्टन आनी हेर नामनेच्या उद्देगीक कंपनींचें स्टॉल आशिल्ले. ह्या मेळाव्यांत 317 उमेदवारांनी नोंदणी केल्ली. मतदारसंघांत वाडपी बेरोजगारीचे फाटभुंयेर हो उपक्रम चालीक लायलो. वेगवेगळ्या क्षेत्रांतल्या कंपनींनी उमेदवारांची मुलाखत घेवपा खातीर आनी पात्र उमेदवारांची निवड करपा खातीर वेगवेगळे कावंटर उबारिल्ले. ह्या मेळाव्यांत 84 जाणांक थंयच्या थंयच नियुक्ती पत्रां दिली.
ह्या उपक्रमांत वांटेकार जाल्ल्या कांय उमेदवारांनी महाराष्ट्रांत नोकरेच्यो संदी स्विकारल्यो. जायत्या तरणाट्यांनी आनी बायलांनी रोखडीच नोकरेची ऑफर मेळिल्ल्यान समाधान उक्तायलें आनी अशा उपक्रमांची गरज आसा अशें
सांगलें.
प्रत्येक सोमारा मुलाखती
हो रोजगार मेळावो एका दिसा खातीर मर्यादीत ना. प्रत्येक सोमारा दिवचले आमच्या कार्यालयांत आमच्या भागिदार 10-12 कपन्यां वतीन एक संयोजक दनपारां 12 ते सांजें 5 मेरेन उमेदवारांची मुलाखत घेवपा खातीर हाजीर आसतलो. ते खातीर तरणाट्यांनी कार्यालयाक भेट दिवचीं, असो उलो चैतन्य मानकर हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
