भांगरभूंय | प्रतिनिधी
दिवचल: लाखोरे, दिवचलेच्या वाठारांत आयज बिरेस्तारा एका णव वर्सां पिरायेच्या भुरग्यान आपल्या कुटुंबाचेर आयिल्लें अरीश्ठ पयस केलें. प्रणव ताटे ताचें नांव. घरांतलीं सगलीं जाणां कामा खातीर भायर सरिल्लीं. प्रणव इश्टां वांगडा घरा शेजरा खेळटालो. खेळून जाले उपरांत तो च्या पिवपा खातीर घरा परतलो तेन्ना ताका घराच्या नळ्यांतल्यान धुंवर येतना दिसलो. ताणें धांवत भितर वचून पळयलें तेन्ना घरांतल्या फ्रिजाक उजो लागिल्लो.
फ्रिजाक उजो लागिल्ल्याचो पळोवन प्रणवान फाटलो फुडलो कसलोच विचार करिनासतना तांणी घरा भायर आशिल्ल्या नळा कडेन धांव घेतली. हाताक मेळटा त्या आयदणान नळांतलें उदक भरून घरांत जळपी फ्रिजाचेर हाडून मारलें. ताच्या ह्या धाडशीपणाक आनी शिटूकसाणेक लागून एक घडणूक जावपा पसून वाटवली. शॉर्ट सर्किटाक लागून हो उजो लागिल्ल्याचो अदमास शेजार्यांनी उक्तायला.
प्रणवाच्या ह्या धाडशीपणाची पुराय दिवचल वाठारांत चर्चा चालू आसा. तशेंच लोक ताची बरीच तोखणाय करतात.
मजगतीं, ताटे कुटुंबियांची अर्थीक स्थिती वायट आशिल्ल्या दिवचलचे आमदार चंद्रकांत शेटये हांणी मजत करची, अशी मागणी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
