भांगरभूंय | प्रतिनिधी
10 लाखांचें भांगर आनी रोकड जप्त
पणजी: दिवचले वाठारांतल्यान 5 एप्रिल दिसा हुबारून व्हेल्ल्या एका नेण्टे चलयेक तीन दिसां भितर कर्नाटकच्या बागलकोट जिल्ह्यांतल्यान सुखरूप सोडोवन हाडपाक गोंय पुलीसांक येस आयलें.
मेळिल्ले म्हायती प्रमाण, कागाळदारान आपली नेण्टी चली एका अनवळखी मनशान पळोवन व्हेल्या अशी कागाळ दिवचले पुलिशेंत केल्ली. चलये वांगडाच घरांतले 10 लाखांचें भांगराचे अलंकार आनी 20 हजार रुपयांची रोकड लेगीत गायब जाल्ली. ह्या प्रकरणांत दिवचले पुलिसांनी गुन्यांव नोंद करून तपास सुरू केल्लो.
तपासा वेळार पुलिसांनी तांत्रिक देखरेख, गुपीत म्हायती आनी सीसीटीव्ही फुटेजचो आदार घेतलो. चलयेच्या हालचालींचेर नदर दवरत आसताना, 7 एप्रिल दिसा ती बागलकोट जिल्ह्यांत आशिल्ल्याचें दिसून आयलें.
खबर मेळटाच पुलिसांचो एक पंगड कुडल संगम हांगा पावलें. थळाव्या पुलिसांच्या आदारान 8 एप्रिल दिसा फांतोडेर 1.30 वरांच्या सुमाराक संगमेश्वर जात्रेंतल्यान चलयेची सुटका केली. घरांतल्यान गायब जाल्लें भांगर आनी रोख रक्कम मेळ्ळी. ती पुलिसांनी जप्त केली. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
