भांगरभूंय | प्रतिनिधी
दिवचल: दिवचलचे नगराध्यक्ष कुंदन फळारी हांणी मंगळार ७ जानेवारीक सकाळीं नगराध्यक्षपदाचो राजिनामो पणजी नगरपालिका संचालनालया कडेन दिलो. ताका लागून आतां दिवचलच्या राजीक मळाचेर परत बोवाळ जाला. फाटल्याच म्हयन्यांत तांचे आड आयिल्लो अविस्वास थारावाचेर कोणेच मतदान करूंक नासलें. तरीय नगराध्यक्ष फळारी हांणी राजीनामो दिल्ल्यान दिवचले चर्चा जातना दिसतात.
फाटल्या ९ डिसेंबराक दिवचलच्या नवो सोमार उत्सवा दिसाच ९ जाणांच्या गटान कुंदन हांचे आड अविस्वास थाराव दाखल केल्लो. ह्या थारावाचेर उपनगराध्यक्ष दीपा पळ, नगरसेवक अनिकेत चणेकार, निलेश टोपले, सतीश गांवकार, तनुजा गांवकार, दीपा शिरगांवकार, ऍड. रंजना वायंगणकार, ऍड. अपर्णा फोगेरी आनी गुंजन कोरगांवकार ह्या णव नगरसेवकांनी सयो केल्ल्यो. सत्ताधारी गटांतली उपनगराध्यक्ष दिपा पळ, नगरसेवक निलेश टोपले आनी एड. रंजना वायंगणकार ह्या तीग जाणांनी विरोधी गटा कडेन हात मेळोवन ह्या अविस्वास थारावाक तेंको दिल्लो.
ताका लागून नगराध्यक्ष कुंदन फळारी हांच्या गटांत तांचे सयत नगरसेवक विजयकुमार नाटेकार, रियाझ बेग, सुदन गोवेकार आनी सुखदा तेली हे पाच जाण उरिल्ले.
ह्या थारावाक लागून थळावे आनी राज्य पांवड्यार भाजप पक्षाक विस्वासांत घेवंक नाशिल्ल्यान अविस्वास थाराव हाडपी भाजपाच्या तिगांचेर भाजप पक्षश्रेष्ठी तिडकल्ले. हेच फाटभूंयेर अविस्वास थाराव फाटीं घेवपाची सुचवणी मुख्यमंत्र्यांनी अविस्वास थाराव हाडपी गटाक केल्ली.
उपरांत अविस्वास थारावाचेर चर्चा करपा खातीर बसके पयलीं सांखळे रवींद्र भवनांत भाजप प्रदेशाध्यक्ष सदानंद शेट तानावडे, मुख्यमंत्री डॉ. प्रमोद सावंत, आमदार डॉ. चंद्रकांत शेट्ये, दिवचलचे पक्षाचे वरिश्ठ फुडारी वल्लभ साळकार, मंडळ अध्यक्ष विश्वास गांवकार, कौस्तुभ पाटणेकार हांचे सयत सगळे नगरसेवकांचे जाल्ले म्हत्वाचे बसकेंत सगळ्यां मदीं एकवट घडोवन हाडिल्लो. तशेंच अविस्वास थारावाक कोणेंच वचनासतना तो सांबाळचो अशें थारिल्लें. ते प्रमाण अविस्वास थाराव बाळगिल्लो.
आतां नव्यान राजकी हालचालींक वेग आयला. थाराव बाळगिले उपरांत नगराध्यक्ष कुंदन फळारी हांणी राजिनामो दिवचो अशी मागणी केल्ल्या गटान पक्षा वतीन राजिनाम्या खातीर नगराध्यक्षांचेर चेंपण हाडलां, अशी म्हायती मुखार आयल्या.
पक्षाच्या सांगण्यावेल्यान अविस्वास थाराव बाळगिल्लो. ताचे बदला नगराध्यक्ष फळारी हांचो राजिनामो घेवपाची मागणी करप ह्या गटान चालूच दवरिल्ले. ते प्रमाण नगराध्यक्ष फळारी हांणी आपल्या पदाचो राजिनामो सादर केलो.
राजिनाम्यांत कारण वेगळें जरी नमूद केलां आसलें तरी राजिनाम्या फाटलें खरें कारण वाडिल्लें चेंपणूच जावन आसा. हें स्पश्ट आसा. कारण अविस्वास थाराव बाळगिले उपरांत सध्याचे परिस्थितींत पक्षाचें नांव इबाडचें न्हय हे खातीर हो एकवट घडोवन हाडला. मात कांय दिसां उपरांत नगराध्यक्ष फळारी हे राजिनामो दितले. पक्ष तांचे कडल्यान राजिनामो घेतले, अशें विरोधी गटांतले नगरसेवक आनी तांचे समर्थक जाहीर उलयताले. हाचेवेल्यान हो राजिनामा म्हणल्यार विरोधी गटाचो आनी पक्षाच्या चेंपणाचोच परिणाम आशिल्ल्याचें एका राजकी जाणकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
