भांगरभूंय | प्रतिनिधी
दिवचल : दिवचलचे दुकानदार आनी वेपार्यांचे अवस्थे कडेन पळोवन, खण वेवसाय येसस्वीपणान परत सुरू केल्यार लोकांचें नशीब बदलतलें आनी ह्या वाठाराची उदरगत जातली, असो विस्वास दिवचल वेपारी संघटणेन उक्तायला. वाडिल्ले म्हारगायेक लागून दुकानदार आनी लोकांचेर परिणाम जाता. तांच्या उत्पन्नांत वाड जायनाशिल्ल्यान तांची अर्थीक परिस्थिती इबाडल्या. दिवचल म्हालाची अर्थीक स्थिती सुदारपा खातीर खण परत सुरू करप गरजेचें, अशें मत संघटणेन उक्तायलें.
एफआयएमआय २०१९ च्या अहवाला प्रमाण, खण वाठारांतले एके नोकरेक लागून अर्थवेवस्थेंत १० अप्रत्यक्ष नोकर्यो निर्माण जातात. दिवचले खाणकाम परत सुरू केल्ल्यान आनी तातूंत वाड जाल्ल्यान प्रत्यक्ष आनी अप्रत्यक्ष अश्यो दोनूय नोकर्यो निर्माण जातल्यो. जाका लागून सरासरी डिस्पोजेबल उत्पन्न आनी खर्चांत वाड जातली. हाका लागून दुकानदारांक उत्पन्न मेळटलेंच, तशेंच जेवणाचे जिन्नस, भाजीपालो आनी विवीध थळाव्या सेवां खातीर मागणीय वाडटली, अशेंय तांणी म्हणलें.
दिवचले ल्हान दुकानां आनी आस्थापनांक मॉल्स आनी शॉपींग कॉम्प्लेक्सांचो वाडपी आंकडो वेपारी समुदायाक आव्हान दितात. तशेंच ऑनलायन खरेदीक वाडपी पसंतीक लागून परिस्थिती आनीक इबाडल्या, ताचो परिणाम दुकानदारांचेर जाला. हाचे भायर फोंडें आनी हेर वाठारांनी बाजाराच्या विस्ताराक लागून गिरायकांचो आंकडो देंवला. लांब काळा खातीर, खण बंदीक लागून उत्पन्न देंविल्ल्यान पारंपरीक बाजार जशें नुस्तें मार्केट रिकामी जावपाक लागलां.
खण परत सुरू जाल्ल्याचे बातमेन दिवचलच्या लोकां मदीं आस्त निर्माण जाल्या. ह्या कामाचो निश्चीतूच सकारात्मक अर्थीक परिणाम जाता. दिवचल हें एक ल्हान शार आशिल्ल्यान, खण परत पूर्ण तांकीन सुरू केल्यार थंयच्या तशेंच आशिकुशीकच्या लोकांची जीण बदलतली, अशी आस्त दिवचल वेपारी संघटणेन उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
