भांगरभूंय | प्रतिनिधी
दिवचल: आर्विल्ल्या काळाक अनुरूप आनी समतावादी विचारसरणीन दिवचल नगरपालिकेन सरकारी नेमा प्रमाण जातीवाचक उल्लेख टाळपाच्या हेतान पालिका वाठारांतल्या दोन वाड्यांचीं नांवां बदलपाचो म्हत्वाचो निर्णय विशेश बसकेंत घेतला. ही म्हायती नगराध्यक्ष विजयकुमार नाटेकार तशेंच मुख्याधिकारी नेहाल तळावणेंकार हांणी दिली.
ह्या निर्णया प्रमाण प्रभाग क्रमांक १०तल्या ‘धनगरवाडों ह्या नांवान वळखपी वाड्याचें नांव बदलून ‘कुळणवाडो’ अशें करतले. तशेंच प्रभाग क्रमांक ३ तल्या ‘हरिजनवाडो’ ह्या वाठाराक ‘राष्ट्रोळी नगर’ अशें नवें नांव दिवपाचो थाराव बसकेंत मंजूर केलो.
हे विशींचो थाराव पालिका प्रशासना वरवीं संबंदीत शासकीय विभाग, वेंचणूक आयुक्त तशेंच हेर संबंदीत कार्यालयां कडेन धाडटले अशें सांगलें. थारावाची बेगोबेग अंमलबजावणी करून संबंदीत वाड्यांचेर नव्या नांवांचो तखटो लावप तशेंच सगल्या शासकीय वेव्हारांत नव्या नांवांचो वापर करपाचो निर्णयूय बसकेंत घेतलो.
धनगरवाडो आनी हरिजनवाडो हांच्या नांवां बदलपा विशीं बसकेंत सविस्तर चर्चा जाली. चर्चे मजगतीं नगरसेवकांनी आपापली मतां मांडून ह्या निर्णयाक येवकार दिलो. मानव हक्क आयोगाच्या शिफारशी तशेंच पालिका प्रशासन खात्याच्या अधिसुचवणे प्रमाण नामकरण केल्ल्याचें ह्या वेळार स्पश्ट केलें.
हे विशे बसकेंत शारांतल्यो विवीध उदरगतीच्या येवजण्यांचो आढावो घेतलो. मार्च वा एप्रील म्हयन्यांत पालिका वेंचणुको जावपाची शक्यताय लक्षांत घेवन वेंचणुके पयलींच हे बसकेंत विवीध विशयांचेर चर्चा केली. ह्या वेळार जमा खर्चाक मान्यताय दिली. तशेंच पालिकेच्या वर्सुकी अंदाजपत्रकाचेरूय सविस्तर चर्चा जाली.
हे बसकेक उपनगराध्य दीपा पळ, नगरसेवक कुंदन फळारी, राजाराम गांवकार, सुदन गोवेकार, निलेश टोपले, अनिकेत चणेकार, गुंजन कोरगांवकार, दीपा शिरगांवकार, रंजना वांगणकार, अपर्णा फोगेरी आनी हेर हाजीर आशिल्लीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
