भांगरभूंय | प्रतिनिधी
10 नोव्हेंबर 2025 दिसा दिल्लींतल्या लाल किल्लो वाठारांत एका मोटारींत जाल्लो स्फोट आतंकवादी घडणूक आशिल्ल्याचें सिद्ध जालां. दिल्लींत बॉमस्फोटा उपरांत तपास यंत्रणांनी खूबशीं दुबावीत थळां आपल्या नियंत्रणांत घेतल्यांत. तातूंत अल-फलाह विद्यापिठाचो आस्पाव आसा. दिल्लीतलो बॉमस्फोट आनी व्हायट कॉलर्डमॉड्यूल उक्तडार आयले उपरांत हरियाणाच्या फरिदाबाद जिल्ह्यांतल्या मुस्लीमांची संख्या चड आशिल्ल्या धौज गांवांतल्या अल-फलाह विद्यापीठ आनी ताचो 76 एकराचो विस्तीर्ण वाठार दुबावांत सांपडला. जैश-ए-मोहम्मदान वेवसायान दोतोर आशिल्ल्या मनशां कडल्यान घृणास्पद बॉम हल्लो केलो ही देशा सयत संवसारा खातीर सामकी घातक घडणूक आसा.
दोतोर पेशाक दैवी शक्ती मानतात. पूण दिल्ली बॉमस्फोटा उपरांत दोतोराच्या पेशाक आतंकवाद्यांनी कलंकीत केलें. तांकां आतां जशाक तशी जाप दिवपाची सामकी गरज आसा. कारण अजापाची गजाल म्हणल्यार हो आतंकवादी हल्लो योग्य रितीन येसस्वी करपा खातीर पुराय आतंकवादी दोतोरकीच्या पेशांतल्यान आपआपली रुपरेखा आनी गायडलायन थारायताले. तेच प्रमाण तांचे हेत सामके घातक आनी भिरांकूळ आशिल्ले. कारण हे हल्ले मुंबय बॉमस्फोटाचे धरतेर आशिल्ल्याचो कट तपास यंत्रणे कडल्यान लक्षांत येता. देशांतल्या व्हड शारांनी 200 परस चड स्फोट करपाचे तयारींत ही आतंकवादी संघटणा आशिल्ली. हातूंत राजधानीतली इंडिया गेट, कॉन्स्टिट्युशन क्लब, गौरीशंकर मंदीर, रेल्वे स्टेशनां, दिल्लींतले मॉल तशेंच गुरुग्राम आनी फरिदाबाद हांगाय तांचो बॉमस्फोट घडोवन हाडपाचो प्लान आशिल्लो अशी म्हायती तपासांतल्यान मुखार आयल्या.
दिल्लीतले हल्ले घडोवन हाडपाचें कारस्थान पाकिस्तानांतल्या जैश-ए-मोहम्मद ही संघटणा जानेवारी सावन कट रचताली हेंवूय उक्तडार आयलां. तेच प्रमाण दिल्लीतलो स्फोट लोकांची चड येरादारी आसता थंय करपाचो तांचो हावेस आशिल्लो. पूण येरादारी सिग्नलाचेर तीन वरां आतंकवाद्यांची गाडी आडकून उरिल्ल्यान व्हड अनर्थ टळिल्ल्याचें सांगतात. तरी लेगीत दिल्लीतलो बॉमस्फोट हो भिरांकूळ आशिल्ल्याचें दिसून आयलें. हाचे वेल्यान स्पश्ट जाता की आतंकवाद्यांक जात, धर्म, पंथ, पेशा, मनीसपण, दोतोर, जाण्टो, नेण्टो हांचे कडेन तांचे कांयच देणेघेणे नासता. तांकां फक्त दहशत निर्माण करून भिरांतीचें वातावरण निर्माण करप होच एकसुरो उद्देश आसता हें स्पश्ट जाता, आनी ह्या हल्ल्याचो सुत्रधार जैश-ए-मोहम्मदच आसा हातूंत दुबाव ना. पूण हातूंत पाकिस्तान आनी थंयची पुराय आतंकवादी संघटणा हातूंत वांटेकार आशिल्ल्याचें दिसून येता.
देशांत आतंकवाद्यांनी खूबशे हल्ले केले, पूण दिल्लीतल्या बॉमस्फोटांत आतंकवाद्यांनी जी टेकनीक आनी टेक्नॉलॉजी वापरली ती सामकी घृणास्पद म्हणची पडटली. कारण संवसारांतलो सगल्यांत व्हड आनी जीवदान दिवपी पेशा हो दोतोरांचो आसता. पूण आतंकवाद्यांच्या कारवायेचे खूबशे प्लॅन फेल जायत आसात अशें तांचे मास्डटर मायंड आनी आकांक दिसूंक लागलां. अशे परिस्थितींत आतंकवाद्यांनी दहशत निर्माण करपा खातीर दोतोरांचो वापर करून दिल्लींत बॉमस्फोट घडोवन हाडलो आनी हातूंत 13 निरपराध लोकांचो बळी गेलो आनी खूबशे जाण गंभीर रितीन जखमी जाले.
भारतीय लश्करान आतंकवाद्यांचें पुरायपणान भेंड मोडलां आनी मोडत आसात. ताका लागून आतंकवादी तिडकल्यात आसुये. ताका लागून दोतोरकीच्या पेशाचो वापर आतंकवादी हल्ल्या खातीर कसो करूंक येतलो हे खातीर फाटल्या एका वर्सा सावन जैश-ए-मोहम्मदचे आतंकवादी येत्न करीत आशिल्ले आनी त्याच येत्नांतल्यान आतंकवाद्यांनी दिल्ली बॉमस्फोट घडोवन हाडलो ही गजाल स्पश्ट जाता. दिल्ली बॉमस्फोटांत तुर्की कनेक्शन उक्तडार आयलां. हाचे वेल्यान स्पश्ट जाता की ह्या हल्ल्यांत फक्त तुर्की वा पाकिस्तान नासून आंतरराष्ट्रीय आतंकवादी संघटणा ह्या हल्ल्यांत वांटेकार आसुये अशें म्हाका दिसता. कारण भारताची जायत आशिल्ली उदरगत खूबशा देशांक नाकसुऱ्यां वचत आसा. ताका लागून भारत विरोधी देश अशे तरेच्या आतंकवादी कारवायांक मजत करतात आसुये.
लाल किल्ल्या कुशीक जाल्लो भिरांकूळ स्फोट हो फक्त अपघात नाशिल्लो जाल्यार 6 डिसेंबराक मोटो आतंकवादी हल्लो करपाचें नियोजन आतंकवादी संघटणेचें आशिल्ले ही गजाल लेगीत उक्तडार आयल्या. अधिकाऱ्यांच्या मतान फरिदाबाद मॉड्यूल वेळार उक्तडार येवंक नाशिल्लें जाल्यार 6 डिसेंबराक दिल्लींत भिरांकूळ स्फोट जावपाचो अशेंय सरकारी गोपां कडल्यान समजता. म्हणल्यार आतंकवाद्यांचो हावेस भिरांकूळ आशिल्लो. पूण देशाच्या सुरक्षा एजन्सीन खूबशे कडेन धाडी घालून व्हड प्रमाणांत स्फोटकां जप्त केलीं आनी आतंकवाद्यांचे फुडलें नियोजन निर्फळ थारायले. दिल्ली बॉमस्फोटाची खूबशा देशांनी निंदा केली. पूण पाकिस्तान म्हणटा, दिल्लीतलो बॉम ब्लास्ट हो सिलिंडराक लागून जाल्लो स्फोट आसा. हाचें वेल्यान स्पश्ट जाता की पाकिस्तानाची शेंपडी वांकडी ती वांकडीच.
दिल्लींतल्या बॉमस्फोटा वेल्यान स्पश्ट जाता की भारतांतल्यो कांय संघटणां पाकिस्तान, तुर्की सयत आंतरराष्ट्रीय आतंकवाद्यां कडेन जुळिल्ल्यो आसुये. देशांतले जनतेन आतंकवाद्यांक नानपयत करपा खातीर सरकाराक आनी सुरक्षा विभागाक सगले तरेची मजत करची. सरकार आनी सुरक्षा विभाग आपआपले पद्दतीन कार्य करीत आसात. तरी लेगीत लोकांचें सहकार्य गरजेचें आसता. 10 नोव्हेंबर 2025 देशा खातीर काळो दीस थारलो. ह्या आतंकवादी हल्ल्यांत मरण आयिल्ल्यांक आर्गां ओंपतां आनी जखमी जाल्ले नागरीक बेगीन बरे जावचे अशी देवा कडेन प्रार्थना करतां. जय हिंद!
रमेश लांजेवार,
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
