भांगरभूंय | प्रतिनिधी
वास्कोः दिल्ली सावन रेल्वेंतल्यान वास्को चिकनाच्या नावान गोरवांची जीब धाडपाची घडणूक शेनवारा, 29 मार्चाक बजरंग दलाच्या एका कामगाराच्या आनी वास्को रेल्वे पुलिसांच्या सादूरपणाक लागून उक्तडार जाली. वट्ट 179 किलाची दोन पार्सलां धाडिल्ली. वास्को रेल्वे पुलिसांनी ती जप्त केल्यात. तशेंच पार्सलां व्हरपाक आयिल्ल्या एका मनशाक ताब्यांत घेतलो. रेल्वे विभागीय सल्लागार समितीचो वांगडी किरण नायक आनी बजरंग दल कार्यकर्त्यांनी आतां गोरवांच्या मांसाची रेल्वेमार्गान येरादारी जाता हाचेर अजाप उक्तायलां.
मेळिल्ले म्हायती प्रमाण, दिल्लीच्या हजरत निजामुद्दीन रेल्वे स्टेशनांवेल्यान वास्को रेल्वे स्टेशनाचेर दोन पार्सलां धाडिल्ली. तातूंत चिकन आसा अशें सांगिल्ल्यान ती पार्सलां थंय तपासूंक ना. पूण ह्या पार्सलांतल्यान चिकना बदला गोरवांची जीब धाडटा हें बजरंग दलाच्या कार्यकर्त्यांक लक्षांत आयिल्लें. हे कार्यकर्ते फाटलें कांय दीस सादूर आशिल्लें.
वास्को रेल्वे पुलिसांकय ह्या प्रकरणाची म्हायती मेळ्ळी तेन्ना तांणी पार्सला संबंदी चवकशी सुरू केली. वास्को रेल्वे स्टेशनाचेर पार्सल घेवपाक आयिल्ल्या एका मनशाक ताब्यांत घेतलो. उपरांत पार्सलां उगडली तेन्ना भितर गोरवांच्यो जीबो मेळ्ळ्यो. पशुपालन आनी पशुवैजकी खात्यांतल्या पशुवैजकांक ह्या प्रकरणाची म्हायती दिली तेन्ना तांणी पार्सलाची तपासणी करून आपलो अहवाल सादर केलो. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
