भांगरभूंय | प्रतिनिधी
भाजपा आमदार, मंत्र्यां सयत काँग्रेसीच्या कार्लोस फेरेराचो आस्पाव
भांगरभूंय | प्रतिनिधी
पणजीः गोंय विधानसभेचें पावसाळी अधिवेशन सोंपता थंय आसा, मंत्री आनी आमदारांची दिल्ली भोंवडी सुरू जाल्या. काँग्रेसीचे आमदार कार्लोस फेरेरा दिल्लींत गेल्ल्यान चर्चा सुरू जाल्या.
मंत्री रोहन खंवटे, सुभाष फळदेसाय, आलेक्स सिक्वेरा हांचे वांगडा मगोचे आमदार जीत आरोलकार आनी काँग्रेसीचे आमदार कार्लोस फेरेरा हे सध्या दिल्लींत आसात. बिरेस्तारा मंत्री फळदेसाय आनी आमदार जीत आरोलकार हांणी खासदार सदानंद शेट तानावडे हांची दिल्लींत भेट घेतली. संसदेचें काम कशें चलता तें पळोवपाक आनी केंद्रांतल्या दोन मंत्र्यां कडेन बसका घेवपाचीय वेवस्था करपाक तानावडे हांणी आपल्याक आमंत्रण दिल्लें. ह्याच हेतून आपूण दिल्लींक आयिल्लो अशें जीत आरोलकार हांणी ‘भांगरभूंय’ कडेन उलयतना सांगलें. पूण, काँग्रेसीचे आमदार फेरेरा दिल्लींक नेमको कित्याक गेला हाची म्हायती मेळूंक ना. आयज वा फाल्यां आनीक एक मंत्री दिल्लींक वचूं शकता अशी म्हायती सूत्रांनी दिल्या.
मजगतीं, पावसाळी अधिवेशन सोंपताच राज्य मंत्रीमंडळांत बदल जातलो आनी दोन ते तीन मंत्र्यांक काडटले, असो संकेत मुख्यमंत्री डॉ. प्रमोद सावंत हांणी अधिवेशना पयलीं दिल्ले. हे फाटभुंयेर मंत्री आनी आमदार दिल्लींक भेट दिवपाक सुरवात केल्ल्यान गोंयांत व्हड राजकी बदल जावपाचे आसात, हे चर्चेन नेट धरला.
खंवटे करतलो राणेची कागाळ?
पावसाळी अधिवेशन काळांतल्या निमाण्या मंत्रीमंडळ बसकेंत नगरनियोजन (टीसीपी) दुरुस्ती विधेयका वयल्यान मंत्री रोहन खंवटे आनी टीसीपी मंत्री विश्वजीत राणे हांचे मदीं खूब वाद जाल्लो. खंवटे आनी मंत्री बाबूश मोन्सेरात हांणी केल्ल्या खर विरोधा उपरांत मंत्री राणे हांणी टीसीपी सयत चारूय विधेयकां फाटीं घेतिल्लीं. अधिवेशन सोंपताच टीसीपी दुरुस्तीक विरोध केल्ले मंत्री खंवटे दिल्ली गेल्ल्यान ते विश्वजीत राणे हांची कागाळ भाजपाच्या दिल्लींतल्या ज्येश्ठ फुडाऱ्यां कडेन करतले काय कितें हाचेर राजकी मळार लक्ष लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
