भांगरभूंय | प्रतिनिधी
रमेश तवडकार हांकां विनवणी, गोंयांतूच रावपाची मागणी
भांगरभूंय । प्रतिनिधी
काणकोणः काणकोणचे उदरगती खातीर तुमची गोंयाक गरज आसा. तुमी लोकसभा वेंचणूक लडोवची न्हय, गोंयांतूच रावचे आनी काणकोणची उदरगत करची, अशी विनवणी काणकोणचे नगराध्यक्ष रमाकांत नायक गांवकार हांणी काणकोणचे आमदार रमेश तवडकार हांकां केली.
राजबाग ते चावडी मेरेनच्या रस्त्याच्या नुतनीकरण करपाच्या कामाक सुरवात करपाचे कार्यावळी नगराध्यक्ष नायक गांवकार उलयताले. ह्या वेळार सभापती तशेंच काणकोणचे आमदार रमेश तवडकार, नगरसेवक गंधेश मडगांवकार, भाजपा मंडळाचे अध्यक्ष विशाल देसाय, उपनगराध्यक्ष निर्सिस्को फर्नांडीस, नगरसेविका अमिता पागी, खोतीगांवचे सरपंच आनंदू देसाय, महेश नायक, चंदन धुरी, मंगेश पागी, सिद्धार्थ देसाय, कंत्राटदार दर्शन नायक गांवकार, अशोक पागी, आदले नगराध्यक्ष रत्नाकर धुरी हाजीर आशिल्ले.
सभापती तवडकार हांणी सांगलें, फुडल्या कांय दिसां भितर तिर्वाळ वाठारांत श्रमधाम येवजणेंतल्यान थंयची शाळा बांदतले. तशेंच अंत्योदय तत्वाचेर गरिबांक पुण्यदान येवजणे खाला दर म्हयन्याक तीन हजार रुपया दितले. काणकोणच्या खंयच्याच मनशान निरशेवचें न्हय, हे खातीर आपले यत्न आसात. काणकोणची उदरगत हेंच आपलें ध्येय.
थळावे नगरसेवक गंधेश मडगांवकार हांणी सांगलें, सभापती रमेश तवडकार हांणी राजबाग प्रभागांतल्या लोकांक भरभरून दिलां. 10 सरकारी नोकऱ्यो, विजेचो ट्रान्सफोर्मर आनी आतां रस्त्याचें डांबरीकरण. हीं सगळीं कामां सभापतीच्या आशिर्वादान जाल्यांत.
विशाल देसाय हांणी सांगलें, 18 वर्सांनी राजबाग ते चावडी रस्त्याच्या हॉटमिक्स डांबरीकरणाक सुरवात जाता. हे आदींच्या आमदारां कडेन ह्या रस्त्याच्या डांबरीकरणा खातीर विनवणी केल्ली, पूण तांकां तें जालें ना. सुमार 1 कोटी 75 हजार रुपया खर्च करून चावडी ते राजबाग मेरेन राखणे वणत बांदप, पांच व्हांऴुल्यांचें नुतनीकरण करप तशेंच 16 लाख रुपया खर्च करून म्हशीव्होळी वाठारांतले मुशीचें नुतनीकरण करप, अश्या विवीध कामांक सुरवात केली. आतां ह्या रस्त्याचें काम करतनाच रस्त्या कुशीचीं गटारां पयलीं बांदून घेतले. ताका लागून नुतनीकरण केल्लो रस्तो बेगीन पेड्डेर जावचो ना, हाची दखल घेतले, अशें तांणी सांगलें. शिवा धुरी हांणी नाल्ल फोडून कामाक सुरवात केली. सुत्रसंचालन रामनाथ पागी हांणी केलें जाल्यार किरण नायक हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
