भांगरभूंय | प्रतिनिधी
पणजी: नवी दिल्ली प्रजासत्ताक दिसा निमतान गोंय राज्याचो चित्ररथ तयार करपा खातीर सरकारान निविदा काडल्या. जी एजन्सी पयलीं दिल्ली प्रजासत्ताक परेडांत वांटेकार जाल्ली तेच चित्ररथ करपाक पात्र थारतले, अशी कळोवणी म्हायती आनी प्रसिध्दी खात्यान जारी केल्या.
भारत सरकार दर वर्सा २६ जानेवारींक प्रजासत्ताक दिसा निमतान राष्ट्रपती भवन ते कर्तव्य पथ हांगा परेड घडोवन हाडटा. हे परेडींत देशांतलीं विंगड विंगड राज्यां आपलें दायज आनी संस्कृताय दाखोवपी चित्ररथांची मिरवणूक घडोवन हाडटात. अंदूंच्या प्रजासत्ताक दिसाचे परेडांत वांटेकार जावपाचो हावेस गोंय सरकारान उक्तायला.
म्हायती आनी प्रसिद्धी संचालनालय, गोंय सरकार हांणी गोंयचे राज्यपाल हांचे वतीन प्रजासत्ताक दिसाच्या सांस्कृतीक संचलनांत वांटेकार जावपा खातीर फकत गोंय राज्यांतल्या आनी नवी दिल्लींतल्या एजन्सी कडल्यान अर्ज मागयल्यात.
उण्यात उण्यो दोन वा अदीक खेपे वांटेकार जाल्ल्यो एजन्सी ह्या कामा खातीर पात्र थारतल्यो. प्रजासत्ताक दीन चित्ररथ २०२६ डिझायन, मॉडेल, फेब्रिकेशन आनी सादरीकरण ह्या तिनूय टप्प्यां खातीर खात्यान निविदा मागयल्या. हो चित्ररथ २६ जानेवारी २०२६ दिसा नवी दिल्ली संचलनांत सादर करपाचो आसा.
पुराय अर्ज सगल्या दस्तावेजां सयत ६ नोव्हेंबर २०२५ पयलीं दनपरां ३.३० वरां मेरेन सादर करचे. इत्सुकांक निविदा कळोवणी आनी ई-निविदेंत वांटेकार जावपा खातीर तपशील म्हायती खातीर https://eprocure.goa.gov.in हे वॅबसायटीक भेट दिवची, अशी सुचोवणी म्हायती आनी प्रसिध्दी खात्यान काडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
