भांगरभूंय | प्रतिनिधी
नवी दिल्ली : दिल्ली पुलिसांनी गोंयांत येवपाचो आशिल्लो २ कोटींचो मलाना क्रिम (चरस) जप्त केलो. हे विशीं दिल्ली, गोंय आनी मध्यप्रदेशांतल्या तिगांक अटक केल्या. हातूंत गोंयांत रावपी पुर्तुगेज नागरिकांचो आसपाव आसा.
हे विशीं चड म्हायती प्रमाण, नव्या वर्साच्या येवकार खातीर गोंयांत आयोजीत केल्ल्या पार्ट्यांनी ड्रग्साची नियोजीत पुरवण करपाचे आशिल्ले. गुपीत म्हायतीच्या आदारार दिल्ली पुलिसांनी कारवाय करून गोंयच्या दोगां सयत तिगांक अटक केली. चवकशे वेळार जायत्यो धक्को दिवपी घडणुको मुखार आयल्यो. हे विशीं अटक केल्ल्या चौहान हांणी पुलिसांक दिल्ले म्हायती प्रमाण, गोंयचे दोग पुर्तुगेज नागरीक हेर पर्यटकांक ड्रग्स दिताले. चौहान हो स्वता ड्रग्स घेता. तो हिमाचल सावन ड्रग्स घेवन गोंयांत येतालो. दर किला फाटल्यान तो ५० हजार रुपया मोबदलो घेतालो. फाटल्या सप्टेंबर सावन तो हें काम करतालो अशी म्हायती मुखार आयल्या.
हे म्हायतीच्या सादाराचेर दिल्ली पुलिसांनी फर्नांडीस आनी फुर्तादो ह्या पुर्तुगेज नागरिकांक अटक केली. तांचे कडल्यान मेळिल्ले म्हायती प्रमाण, फर्नांडीस हो गोंयच्यान हिमाचलाक चरस घेवपाक येतालो. हांगच्यान हीं घुवळें वखदां गोंयांत तशेंच हेर राज्यांनी तो दर वाडोवन विकतालो. जाल्यार फुर्तादो हो ह्या वेव्हारांतलो मुखेल व्यक्ती आशिल्लो. तो ड्रग्साचे पुरवणेचें काम पळयतालो. मजगतीं, ह्या तिगांचेर घुवळें वखदां विरोधी कायद्या खाला योग्य कलमा खाला गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
