भांगरभूंय | प्रतिनिधी
नवी दिल्ली, खबरां संस्था: दिल्ली पुलिसांच्या गुन्यांव फांट्यान मंगळारा (९ जुलय) ‘इंटरनॅशनल ऑर्गन ट्रान्सप्लांट’ टोळी उक्ताडार हाडली. ह्या प्रकरणांत दोतोरा सयत ७ जाणांक अटक केल्या. हे टोळयेचो मास्टरमायंड बांगलादेशी आसा अशें गुन्यांव फांट्याचे डीसीपी अमित गोयल हांणी सांगलें.
टोळयेंत आशिल्लो रसेल नांवाचो मनीस दुयेंती आनी रक्तदात्यांचो बंदोबस्त करतालो. दरेका प्रत्यारोपणा खातीर तो २५- ३० लाख रुपया घेतालो. हे टोळी २०१९ सावन वावुरताली.
३ म्हयन्यां आदीं भुरगीं विकत घेवपी-विक्री करपी टोळी धरिल्ली
सीबीआयन दिल्लीच्या केशवपुरम हांगच्या घरांतल्यान तीन बाळकांची सुटका केल्ली. तातूंत दोन चले आनी एक चली आशिल्ली. एप्रीलांत दिल्लीक ल्हान भुरग्यांक विकपी- विकत घेवपी टोळयेक धरिल्ली. केंद्रीय अन्वेषण विभागान (सीबीआय) ५ एप्रिलाक दिल्ली आनी हरियाणा ७ सुवातांचेर छापे घातिल्ले. ह्या वेळार दिल्लींतल्या केशवपुरम हांगच्या घरांतल्यान तीन बाळकां सांपडिल्लीं. तशेंच सीबीआयन हॉस्पिटलाच्या वॉर्ड बॉय सयत ७ जाणांक अटक केल्ली. हातूंत ५ बायलांचो आस्पाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
