भांगरभूंय | प्रतिनिधी
दिल्ली कॅपिटल्स आनी मुंबय इंडियन्स ह्या पंगडां मदीं बायलांची प्रिमीयर लिगेची (डब्ल्यूपीएल) फायनल आयज हांगाच्या ब्रेबॉर्न स्टेडीयमाचेर जातली. दिल्ली कॅपिटल्स किताबाचो दुकळ सोंपोवपाक इत्सूक आसा. पूण, तांच्या मुखार मुंबय इंडियन्साची नॅट सायवर ब्रण्ट आनी हेली मॅथ्यूज आसा. ब्रण्टान 493 धांवड्यो केल्यात आनी 9 विकेटी घेतल्यात, जाल्यार हेली मॅथ्यूजान 17 विकेटी घेतल्यात तशेंच 304 धांवड्यो केल्यात. दोगांय अंदूंचे डब्ल्यूपीएलाचे बॅटींग आनी बॉलींग गुणक्रमवारींत पयले सुवातेर आसात.
दोगांय आपलो हो फॉर्म आयचे मॅचींत लेगीत कायम राखता जाल्यार दिल्ली कॅपिटल्साक किताब जिखपाक कठीण जावपाक शकता. दिल्ली कॅपिटल्साचें फुडारपण मेग लॅनींग करता. आंतरराष्ट्रीय क्रिकेटींतल्यान निवृत्त जावपी लॅनींग बायलांचे क्रिकेटींतली येसस्वी मुखेल्यांतली एक आसा. दादल्यांच्या पंगडा भशेन दिल्ली कॅपिटल्साच्या बायलांच्या पंगडाक लेगीत किताबान अजून मेरेन हुलकावणी दिल्या.
दिल्ली कॅपिटल्सान उत्कृश्ट नेट रन रेटीच्या आदाराचेर थेट फायनलींत सुवात मेळयल्या, जाल्यार मुंबय इंडियन्सान एलिमिनेटरांत गुजरात जायण्ट्साक हारोवन फायनलींतली सुवात निश्चीत केल्या.
मुंबय इंडियन्साक ब्रेबॉर्न स्टेडीयमार कशें खेळप हें बेसबरें खबर आसा. हाचो फायदो घेवपाचो ताचो यत्न आसतलो. मुंबय इंडियन्साची बॅटींग घटमूट आसा. तांकां आडावपाक दिल्ली कॅपिटल्साच्या बॉलरांक आपलें सर्वोत्कृश्ट प्रदर्शन करचें पडटलें. मुखेली हरमनप्रीत कौर फॉर्मांत आयल्या, हाचो फायदो लेगीत मुंबय इंडियन्साक जातलो. मुंबय इंडियन्स दुसरो किताब जिखपाक इत्सूक आसा.
दिल्ली कॅपिटल्सा वतीन अजून मेरेन स्पिनर जेस जोनासन आनी भारताची अणभवी फास्ट बॉलर शिखा पांडेन बरें प्रदर्शन केलां. दोगांयनी अजून मेरेन 11-11 विकेटी घेतल्यात. जेस आनी शिखा हांच्या उत्कृश्ट प्रदर्शनाच्या नेटार दिल्ली कॅपिटल्साक रावण्ड रॉबिनांतले आपले निमाणे मॅचींत मुंबय इंडियन्साक 9 बाद 123 धांवड्यांचेर आडावपाक येस आयिल्लें. मुंबयच्या बॅटरांक ह्या दोगां आड सादूर रावपाची गरज आसा. ब्रण्ट आनी मॅथ्यूज हांणी अजून मेरेन बरी बॉलींग केल्या. पूण, मुंबयच्या आक्रमणाचो कणो अश्टतासांची खेळगडी अमेलिया आसा. तिणें अजून मेरेन 16 विकेटी घेतल्यात.
बॅटिंगेक अनुकूल परिस्थितींत लेग स्पिनर शेफाली वर्मा हाची भुमिका म्हत्वाची थारतली. मुंबय वतीन ऑफ स्पिनर संस्कृती गुप्ता हिणें अजून मेरेन बरें प्रदर्शन केलां. तिणें अजून मेरेन चार विकेटी घेतल्या आसल्यो तरी तिची इकॉनॉमी रेट साता परस उणी आसा.
दिल्लीची शेफालीची पावर प्लेंतली बॅटींग म्हत्वाची थारतली. तिचे खेरीत दिल्ली वतीन लॅनींग हिणें लेगीत बरी बॅटींग केल्या. तिणें अजून मेरेन 263 धांवड्यो केल्यात. युवा बॅटर निक्की प्रसाद हिणें लेगीत मेळिल्ले संदीचो फायदो घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
