दिल्ली कॅपिटल्साचो जैताचो चवको

भांगरभूंय | प्रतिनिधी

दिल्ली कॅपिटल्सान सेगीत चवथें जैत जोडलें. हांगाच्या एम चिन्नास्वामी स्टेडियमाचेर जाल्ले मॅचींत रॉयल चॅलेंजर्स बंगळुरूक 6 विकेटींनी हारयलो. बंगळुरून दिल्ले 164 धांवड्यांचे मोखीचो फाटलाव करपी दिल्ली कॅपिटल्सान 17.5 ओव्हरींनी 4 विकेटी व्हगडावन 169 धांवड्यो करून जैत जोडलें. दिल्लीच्या लोकेश राहुलान नाबाद 93 धांवड्यांची खेळी केली.

ते आदीं टॉस हारल्या उपरांत पयलीं बॅटींग करपी रॉयल चॅलेंजर्स बंगळुरू वतीन फिल सॉल्ट आनी विराट कोहली हांणी डावाची सुरवात केली. फिल सॉल्टान सुरवातीक आक्रमक भुमिका घेतली. ताच्या आक्रमक बॅटिंगेक लागून बंगळुरून चार ओव्हरी भितर 60 धांवड्यो केल्यो. पूण, चवथे ओव्हरींत गडबड जाली. धांवडी घेवपाक धांवंत येवपी सॉल्टाक कोहलीन परतून वचपाक सांगलें आनी तो धांवबाद जालो. सॉल्टान चार चवके आनी तीन सक्यांचे मजतीन 37 धांवड्यो केल्यो.

ते उपरांत थारावीक अंतरान बंगळुरूच्यो विकेटी पडत गेल्यो. सवे ओव्हरींत देवदत्त पडिक्कल (1) मुकेश कुमाराचे बॉलिंगेचेर बाद जालो. जाल्यार फुडले ओव्हरींत विराट कोहलीची आडखळ विपराज निगम पयस केली. कोहलीन 14 बॉलांनी 22 धांवड्यो केल्यो. ते उपरांत मुखेली रजत पाटिदार आनी लियाम लिव्हिंगस्टोन हांणी डाव सांबाळपाचो यत्न केलो. पूण, लिव्हिंगस्टोनाक (4) मोहित शर्मान बाद केलो. ते उपरांत जितेश शर्मा (3) कुलदीप यादवाचो शिकार थारलो. 15वे ओव्हरींत फॉर्मांत आशिल्लो रजत पाटिदाराक कुलदीप यादवान बाद करून बंगळुरूक व्हड धपको दिलो. रजतान 23 बॉलांनी 25 धांवड्यो केल्यो.

कृणाल पांड्या (18) हाका विपराज निगमान बाद केलो. अखेरच्या ओव्हरींनी टीम डॅव्हिडान केल्ल्या आक्रमक बॅटिंगेक लागून बंगळुरूक 150चो टप्पो हुपपाक येस आयलें. बंगळुरून 20 ओव्हरींनी 7 विकेटी व्हगडावन 163 धांवड्यो केल्यो.

दिल्ली वतीन विपराज निगम आनी कुलदीप यादव हांणी दरेकी 2 विकेटी घेतल्यो. मुकेश कुमार आनी मोहित शर्मा हांकां एकेक विकेट फावो जाली.