भांगरभूंय | प्रतिनिधी
हांगाच्या अरुण जेटली स्टेडियमाचेर आयज बायलांचे प्रिमीयर लिगेची (डब्ल्यूपीएल) फायनल दिल्ली कॅपिटल्स आनी रॉयल चॅलेंजर्स बंगळुरू ह्या पंगडां मदीं जातली.
फॉर्मांत आशिल्ल्या दिल्ली कॅपिटल्साक पोरूं किताबान हुलकावणी दिल्ली. पूण, फाटले खेपे केल्ल्यो चुकी टाळून वस्तादपण जोडपाचो ताचो यत्न आसतलो.
फाटले लिगेचे फायनलींत ताका मुंबय इंडियन्सा कडल्यान 7 विकेटींनी हार घेवची पडिल्ली. फाटल्या लिगेंत केल्ल्या प्रदर्शना कडेन अंदूंच्या प्रदर्शनाची तुळा केली जाल्यार दिल्ली कॅपिटल्स फॉर्मांत आसा. आठा मॅचींतल्यान 12 गूण घेवन गुणतकट्यांतली पयली सुवात मेळयिल्ली. मेग लेनिंगान आठ डावांनी खेळटना 308 धांवड्यो केल्यात. जाल्यार दक्षीण आफ्रिकेची अश्टतासांची खेळगडी मारियाने काप आनी ऑस्ट्रेलियेची स्पिनर जोनासेन हिणें दरेकी 11 विकेटी घेतल्यात.
अंदूंच्या हंगामांत दिल्लीक दोन मॅचींनी हार घेवची पडल्या. एकदा मुंबय इंडियन्स आनी दुसरे खेपे युपी वॉरियर्सा कडल्यान तो हारला. ह्यो दोन मॅची सोडल्यार ताणें उत्कृश्ट प्रदर्शन केलां. डब्ल्यूपीएलांत रॉयल चॅलेंजर्स बंगळुरू आड खेळिल्ल्यो चारूय मॅची तो जिखला. पूण, फायनलींत कितेंय घडपाक शकता. चेपण योग्य रितीन हाताळतलो तोच जिखतलो.
दिल्लीक लेनिंग आनी शेफाली वर्मा हांच्या कडल्यान बरी सुरवात मेळपाची आस्त आसा. मदले फळयेंतली बॅटर जेमिमा रॉड्रिग्स लेगीत फॉर्मांत आसा. पूण, अश्टतासांची खेळगडी एलिसे कॅप्सी आनी काप हांच्या कडल्यान उत्कृश्ट प्रदर्शनाची आस्त पंगडाक आसतली.
बॉलिंगेंत जोनासेन, काप आनी शिखा पांडे हांणी अजून मेरेन बरें प्रदर्शन केलां. स्पिनर राधा यादव हिणें लेगीत 10 विकेटी घेतल्यात आनी अरुण जेटली मैदानाची खेळपट्टी स्पिनरांक मजत करपी आसा, ताका लागून राधा यादवाची भुमिका म्हत्वाची थारतली.
दुसरे वटेन रॉयल चॅलेंजर्स बंगळुरू लीग पांवड्याचेर तिसरे सुवातेर उरिल्लो. पूण, शुक्रारा उमळशीक वाडोवपी एलिमिनेटर मॅचींत उणो स्कोर उबारून लेगीत मुंबय इंडियन्साक हारोवपाक ताका येस आयिल्लें. अश्टतासांची खेळगडी एलिसा पॅरीचेर बॅटिंगेची जापसालदारकी आसतली. तिणें अजून मेरेन 312 धांवड्यो केल्यात. तशेंच सात विकेटी लेगीत घेतल्यात. मुंबय इंडियन्सा आड तिणें अश्टतासांचें प्रदर्शन केल्लें. तिच्याच नेटार बंगळुरूक जैत फावो जाल्लें. पयलीं तिणें 50 बॉलांनी 66 धांवड्यो केल्यो आनी उपरांत एक विकेट लेगीत घेतली. तिका मुखेली स्मृती मंधाना, सोफी डेवायन, रिचा घोष आनी सोफी मोलिनू हांच्या कडल्यान बऱ्या तेंक्याची आस्त आसतली. बॉलिंग विभाग रेणुका सिंग, श्रेयांका पाटील आनी जॉजिया वेयरहेड ही सांबाळटलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
