भांगरभूंय | प्रतिनिधी
बायलांचे प्रिमियर लिगेंत काल जाल्ले पयले मॅचींत दिल्ली कॅपिटल्सान रॉयल चॅलेंजर्स बंगळुरूक 60 धांवड्यांनी हारयलो. टॉस हारल्या उपरांत पयलीं बॅटींग करपी दिल्ली कॅपिटल्सान निर्धारीत 20 ओव्हरींनी 2 विकेटी वगडावन 223 धांवड्यो केल्ल्यो. ताका जाप दितना 20 ओव्हरींनी 8 विकेटी वगडावन 163 धांवड्यो केल्यो.
दिल्ली कॅपिटल्साचे तारा नोरिसान 29 धांवड्यो दिवन 5 विकेटी घेतल्यो. ह्या प्रदर्शनाक लागून तिची प्लेयर ऑफ द मॅच पुरस्कार फावो जालो. दिल्ली वतीन शेफाली वर्मान सगल्यांत चड 84 धांवड्यो केल्यो. मुखेली मेग लेनिंगान 72 धांवड्यांचें योगदान दिलें. रॉयल चॅलेंजर्स बंगळुरू वतीन एकाय बॅटराक 35 परस चड धांवड्यो करपाक शक्य जावंक ना.
224 धांवड्यांचो फाटलाव करपाक मैदानांत देंवपी रॉयल चॅलेंजर्स बंगळुरू वतीन स्मृती मंधाना, हिथर नायट, मिगन शट आनी एलीस पेरी हांचे खेरीत एकाय बॅटराक खास प्रदर्शन करपाक जमूंक ना.
मंधानान 35, नायटान 34 आनी पेरीन 31 धांवड्यो केल्यो. मिगन शट 30 आनी प्रिती बोस दोन धांवड्यो करून नाबाद उरलीं.
स्मृती मंधाना आनी सोफी डिव्हाइन हांणी बंगळुरूक जलद सुरवात करून दिली. दोगांयनी 4.2 ओव्हरींनी 41 धांवड्यांची भागिदारी केली. डिव्हायन 14 धांवड्यो करून बाद जाली. ते उपरांत स्कोरींग रेट उणी जाली. 6 ओव्हरी उपरांत पंगडाचो स्कोर एक बाद 54 आशिल्लो.
ते पयलीं दिल्ली कॅपिटल्सा वतीन शेफाली वर्मान 84 धांवड्यांची खेळी केली. जाल्यार मेग लेनिंगान 72 धांवड्यांचें योगदान दिलें. दोगांयनी पयले विकेटी खातीर 162 धांवड्यांची भागिदारी केली. मारियन कॅपान 17 बॉलांनी 39 आनी जेमिमा रॉड्रिग्सान 15 बॉलांनी 23 धांवड्यांचेर नाबाद उरली. दोगांयनी फकत 31 बॉलांनी नाबाद 60 धांवड्यांची भागिदारी केली. रॉयल चॅलेंजर्स बंगळुरू वतीन हिथर नायटान दोन विकेटी घेतल्यो.
बंगळुरून मॅचींत सात बॉलरांचो वापर केलो. पूण, विकेट फकत एकूच बॉलराक मेळ्ळी. सगल्या बॉलरांनी आठ धांवड्यो प्रती ओव्हरी परस चड इकोनॉमी रेटीन धांवड्यो दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
