भांगरभूंय | प्रतिनिधी
दिल्ली कॅपिटल्सान इंडियन प्रिमियर लिगेचे (आयपीएल) 34वे मॅचींत येजमान सनरायझर्स हैदराबादाक 7 धांवड्यांनी हारयलो. दिल्ली कॅपिटल्सान जैता खातीर दिल्ले 145 धांवड्यांचे मोखीचो फाटलाव करपी सनरायझर्स हैदराबादाक निर्धारीत 20 ओव्हरींनी 6 विकेटी वगडावन 137 धांवड्यो करप शक्य जाल्यो.
दिल्ली कॅपिटल्साचें अंदूंच्या हंगामांतलें हें दुसरें जैत थारलें. ताचे पयलीं ताणें सेगीत पांच मॅची वगडायिल्ल्यो.
अंदूंच्या हंगामांत पुर्णपणान अपेशी दिसतालो. पूण, काल ताका फॉर्म सांपडलो. खरें म्हणल्यार बॉलरांनी दिल्लीक जैत मेळोवन दिलें. हैदराबादा वतीन ओपनर मयंक अग्रवालान सगल्यांत चड 49 धांवड्यो केल्यो. ताचे खेरीत सकयले सुवातेर हॅन्रीच क्लासेनान 31 आनी अश्टतासांचो खेळगडो वॉशिंग्टन सुंदरान नाबाद 24 धांवड्यांची खेळी केली. दिल्ली वतीन एन्रीच नोर्त्जे आनी अक्षर पटेलान दरेकी दोन विकेटी घेतल्यो, जाल्यार इशान शर्मा आनी कुलदीप यादव हांकां दरेकी एक विकेट फावो जाली.
ते आदीं दिल्ली कॅपिटल्सान टॉस जिखून पयलीं बॅटींग करपाचो निर्णय घेतलो. पूण, ताचो हो निर्णय योग्य थारूंक ना. प्ले ऑफांत ताचे दोन बॅट्समन सवाय भितर तंबूंत परतले. फिलिप सॉलटाक भुवनेश्वर कुमारान शुन्याचेर बाद केलो.
ते उपरांत मिचेल मार्शान सादूरतायेन बॅटींग करून 25 धांवड्यो केल्यो. अखेरेक तो नटराजनाच्या बॉलाचेर बाद जालो आनी दिल्ली कॅपिटल्साक दुसरो धपको बसलो. ते उपरांत वॉशिंग्टन सुंदरान एकेच ओव्हरींत मुखेली डॅव्हिड वॉर्नर, सर्फराज खान आनी अमन खान हांकां बाद करून दिल्ली कॅपिटल्साक खर धपके दिले. वॉर्नर 21 धांवड्यो करून हॅरी ब्रुकाक कॅच दिवन बाद जालो. सर्फराज खानाची (10) कॅच भुवनेश्वर कुमारान धरली जाल्यार अमन खानाची (4) कॅच अभिषेक शर्मान धरली.
दिल्लीचो अर्दो पंगड 62 धांवड्यांचेर तंबूंत गेल्लो. अशा वेळार अक्षर पटेल आनी मनिष पांडे हांचे जबरदस्त भागिदारीक करून सनरायझर्साक प्रत्तुत्यर दिलें. तांचेच भागिदारीक लागून दिल्ली कॅपिटल्सान 20 ओव्हरींनी 9 विकेटी वगडावन 144 धांवड्यो केल्यो.
दोगांयनी 69 धांवड्यांची भागिदारी केली. मयांक मार्कंडेन घाल्ले 17वे ओव्हरींत अक्षरान सेगीत तीन चवके मारून धांवड्यांचो वेग वाडयलो. पूण, भुवनेश्वर बॉलिंगेक आयलो आनी ताणें अक्षराक (34) बोल्ड केलो. ते उपरांत मनिष पांडे धांवबाद जालो. वॉशिंग्टन सुंदरान उत्कृश्ट थ्रो करून ही विकेट मेळोवन दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
