भांगरभूंय | प्रतिनिधी
नवी दिल्ली, खबरां संस्था: दिल्लीचे मुख्यमंत्री अरविंद केजरीवाल दोन दिसांनी मुख्यमंत्री पदाचो राजिनामो दितले. अशी घोशणा तांणी आयज केल्या. केजरीवाल हांची १३ सप्टेंबराक तिहारांतल्यान सुटका जाले उपरांत आयतारा पयलेच खेपे ते आम आदमी पार्टीच्या कार्यालयांत पावलो आनी कार्यकर्तां कडेन उलयले. ह्या वेळार तांचे वांगडा आप फुडारी मनीष सिसोदिया, संजय सिंह आनी आतिशी हाजीर आशिल्ले.
केजरीवाल हांणी म्हणलें, आयज हांव एक पुस्तक घेवन आयलां. ही भगतसिंग हांची जेल डायरी. भगतसिंग हांचे उपरांत एक क्रांतिकारी मुख्यमंत्री स्वातंत्र्या उपरांत बंदखणींत गेलो. हांवें हालींच एलजींक पत्र बरयलां. १५ ऑगस्टाक दिल्ली सरकाराचो मुख्यमंत्री बावटो हुबयता. ३ दिसां आदीं हांवें एलजीक पत्र बरयल्लें, म्हजे सुवातेर आतिशी हांकां बावटो हुबोवपाची परवानगी दिवची म्हणून. हें पत्र एलजींक दिवंक ना. एलजी साहेबांक दुसरे फावट पत्र बरोवपाचें धाडस केल्यार म्हजी कुटुंबा कडेन भेट घेवपूय बंद करतले, अशी शिटकावणी दिल्ली.
स्वातंत्र्या उपरांत ब्रिटिशां परस क्रूर आनी जुलमी राज्यकर्तो येतलो अशें ब्रिटिशांकूय दिसूंक ना आसतलें. भगतसिंग आनी बटुकेश्वर हांणी विधानसभेंत बॉम्ब उडयिल्ले. दोगांकूय तेच बंदखणींत शेजारचे कोठडेंत दवरिल्ले. तांणी बटुकेश्वरची भयण प्रमिला हांकां पत्र बरयिल्लें, काल रातीं बटूक दुसरे बंदखणींत धाडला. ताचें वेगळें जावप म्हाका सोंसना. आयज पयलो दीस आसा जाचें दरेक मिनीट म्हाका वजें कशें दिसपाक लागलां. तो म्हाका म्हज्या भावा परस लागींचो आशिल्लो अशें केजरिवाल हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
