दिल्लीचे गादये खातीर ‘चुनावी’ रेवड्यो!

भांगरभूंय | प्रतिनिधी

दिल्लीकारांक सद्या फुकट रेवड्यांचें जें वांटप चालू आसा तातूंत नेमकें कितें आसा असो प्रस्न विचारपा बदला तातूंत कितें ना हाची जाप दिवप सोंपें जातलें.

दिल्लीचे गादये खातीर जावपी लडाय आतां लागीं पावल्या. केन्नाय वेंचणूक जाहीर जावंक शकता हे खातीर ह्या झुजाची कीट तशी पडिल्ल्यांतूच जमा आसा. आम आदमी पार्टी खातीर म्हणत जाल्यार दिल्लीची गादी तांकां ह्या वेळार व्हगडावन चलची ना. कारण ही लडाय ‘आप’च्या जिणेमरणाचो प्रस्न आसा. दिल्लीचे गादयेर बसपा खातीर अशें म्हणचें बदला 45 कोटींचो शीशमहल परतून मेळोवपा खातीर अरविंद केजरीवाल सद्या कसलेंय मोल मेजपाक तयार आसात अशें जर कोणूय म्हणटा आसत जाल्यार तें रास्तूच आसा. आम आदमी खातीर अरविंद केजरीवाल शिशमहालाची लडाय लडपाचे आशिल्ल्याचें भाजपूच कित्याक ‘इंडी’ अघाडीतल्या ‘आप’चो आतां मेरेन इश्ट पक्ष आशिल्ले काँग्रेसीनूय अशेच तरेचो प्रचार हाचे पयलींच सुरू केला आनी केजरीवालांचो ‘शिशमहल’ हे वेंचणुकेंत बरोच गाजतलो अशें चित्र दिसता. आम आदमी पार्टीक ह्या वेळार दिल्ली आपल्या हातांतल्यान खंयचेच परिस्थितींत वचूंक दिवपाची ना. खरें म्हणल्यार तांकां तें परवडपाचेंय ना. दिल्लीचे गादयेर बसपाची संद ह्या वेळार सादली ना जाल्यार परतून बेगीन दिल्ली जिखपाची आशा भाजपाक बाळगूंक येवची ना हेंवूय तितलेंच स्पश्ट आसा. आतां प्रस्न उरलो तो काँग्रेसीचो. राहूल- प्रियांकाचो हो पक्ष सद्या नवसंजिवनीच्या सोदांत आसा आनी लोकसभे उपरांत जाल्ल्या आतां मेरेनच्या विधानसभा वेंचणुकांनी तांणी जोडचे परस चड व्हगडायिल्ल्यानूच दिल्लीच्या मतदारां कडेन एक वेगळे आशेन तांणी पळोवप हें समजुपा सारकें आसा.
दिल्लीची गादी हातासपा खातीर फुडल्या म्हयन्यांत जावपी झुजा कडेन सगल्या देशाचें लक्ष लागून रावप सभाविकूच आसा. तातूंतच ह्या झुजाचो निकाल आपलेच वटेन लागचो हे खातीर आप, काँग्रेस आनी भाजप ह्या तिनूय पक्षां मदीं मतदारांक आपले वटेन ओडून घेवपा खातीर जी सर्त चल्ल्या ती पळयत जाल्यार वेंचणूक आयोग तांकां कित्याक आडायना हाचें आकलन जायना. ‘चुनावी’ रेवड्यांचो पावस सद्या दिल्लीच्या मतदारांचेर पडूंक लागला आनी दिल्लींत सद्या सत्तेर आशिल्ली आम आदमी पार्टी हातूंत खूबशी आघाडेर आसा. हें अशेंच चालू उरलें आनी केजरीवालांचो पक्ष परतून सत्तेर आयलोच जाल्यार दिल्लीच्या मतदारांक तांचे रोजीरोटी खातीर आपल्या घरांतल्यान भायरूय सरचे न पडुये. सोरो घोटाळ्यांतलो मुखेल आरोपी अरविंद केजरीवाल हांकां पयली मुख्यमंत्रीपद उपरांत आपलो सुमार 45 कोटी रुपया खर्च करून उबारिल्लो शिशमहल व्हगडावचो पडटलो. हें सगलें परतून मेळोवपा खातीर केजरीवाल सद्या तांकां जो मेकळो वेळ मेळ्ळा ताचो सदुपेग करून मतदरांच्या दारां कडेन भोंवत फुकट रेवड्यो वांटपाचें काम सेगीत करीत आसात. आम आदमी कडल्यान दिल्लीकारांक सद्या फुकट रेवड्यांचें जें वांटप चालू आसा तातूंत नेमकें कितें आसा असो प्रस्न विचारपा बदला तातूंत कितें ना हाची जाप दिवप सोंपें जातलें. ‘लाडली बेहना’ ही संकल्पना सद्या देशभरांत खूबशी ‘हीट’ थारल्या, मध्य प्रदेश आनी महाराष्ट्र ह्या दोनूय राज्यांनी भारतीय जनता पक्षानूय होच ‘मंत्र’ वापरून सत्ता मेळयिल्ल्यान अरविंद केजरीवाल हांच्या पक्षानूय दिल्लीत ताचीच री ओडली ना जाल्यार तें अजाप थारपाचें.
‘लाडकी बहीण’ येवजण जाहीर करून दरेक भयणी खातीर म्हयन्याक एक हजाराची मजत दिवपा खातिरूय कांयच फरक पडचो नाशिल्लो, पूण आतां तातूंतय दोन हजार शंबर रुपया मेरेन वाड करपाची घोशणा करून आम आदमीन हेरांक फाटीं उडयल्यात. आतां हें सगलें हांगाच थांबतलें अशें कोणाक दिसता आसत जाल्यार तें चुकीचें थारतलें. नवसंजिवनीच्या सोदांत आशिल्ल्या काँग्रेस पक्षान आतां लाडक्या भयणींक म्हयन्याक तीन हजारां मेरेन अर्थीक मजत करपाची येवजण जाहीर करपाचें थारायिल्ल्यान प्रत्यक्ष वेंचणूक जाहीर जाय मेरेन हो आंकडो खंय मेरेन पावतलो हाची आतांच कल्पना करूंक येवची ना.
भारतीय जनता पक्षाचे फुडारी हाचे वेल्यान आम आदमी पार्टीचेर नेटाचो हल्लो करीत आसले तरी हो पक्षूय फुकट रेवड्यो वांटपा खातीर थोडोच फाटी रावतलो. ताका लागून फुडल्या 15-20 दिसांत अजून अशे तरेच्यो खूब घोशणा जायत जाल्यार ताचें अजाप दिसचें न्हय. आम आदमीन जाल्यार समाजांतलो असो एकूय घटक सोडलो ना की जांकां तांणी अर्थीक पॅकेज जाहीर केली ना. पुजारी आनी ग्रंथींकूय म्हयन्याक अठरा हजारांची पॅकेज जाहीर करून आपूण ल्हवू ल्हवू हिंदुत्वा कडेन वळत आशिल्ल्याचेंय केजरीवाल हांणी दाखोवन दिलां. अर्थांतूच हें करतना मौलवींक जाहीर केल्ली मजत फाटल्या वर्स देड वर्स दिवप तांकां शक्य जालें ना हाचोय विस्फोट जालो आनी मुस्लिमांची निरशेवणी तांणी गरजे भायर ओडून घेतली. फुकट रेवड्यांचेरच राज्यांचें पूर्ण बजेट खर्च जावपाचें आसत जाल्यार विकासकार्या खातीर राज्य सरकार निधी खंयच्यान हाडटलो हो खरो प्रस्न आसा. ताका लागून रेवडी संस्कृतायेचेर आतांच प्राधान्यान विचार करपाची वेळ आयल्या.
दिल्लीचे गादये खातीरची लडाय परतून जिखपा खातीर आम आदमी पार्टी आनी तांचे फुडारी मतदारांचेर फुकट रेवड्यांचो पावस घालीत आसले तरी ह्या वेळार तांचे खातीर ही लडाय निश्चितूच सोंपी आसची ना. भाजप आनी काँग्रेस पक्षानूय आम आदमी पार्टीक चारूय वटांनी खूबशा मुद्यां वयल्यान घेरलां. केजरीवाल हांचो 45 कोटींचो शिशमहल हे वेंचणुकेंत आम आदमी खातीर खूबसो अडचणींचो थारूंक शकता. कोवीड काळांत दोन वर्सा दिल्लींत विकास येवजण्यो पडून उरल्यो, पूण त्याच काळांत उबारिल्लो आम आदमीचो शिशमहल केजरीवालाच्या घशांत आडकूंक शकता अशी आयज चिन्नां दिसतात. अ‍ॅन्टी इंकम्बसीचो चटको आनी झटको ‘आप’क लागूंक शकता. उमेदवार पयलींच जाहीर करून आपूण आघाडेर आशिल्ल्याचें दाखयत आसले तरी सोरो घोटाळ्या वेल्यान उप्रासतल्या मुद्यांचेर केजरीवाल हांकां लंगडे समर्थन करचें पडटा. प्रधानमंत्री नरेंद्र मोदी हांणी लेगीत दिल्लींत प्रचाराचो धडाको लायला आनी ‘आप’ ही दिल्लीचेर कोसळिल्ली आपत्ती आसा अशें ते सांगत आसात. मुख्यमंत्रीपदा खातीर भाजपा कडेन आयज योग्य असो चेरो ना ही तांची मुखेल अडचण आसा. हजारांनी कोटींच्या विकास कामाचो धडाकोय भाजपान लायला. काँग्रेस हो तसो दिल्लींत जनाधार आशिल्लो पक्ष आसा. पूण पक्षाचें फुडारपण तांचो विस्वासघात करता. पक्षांतली गटबाजीय मारक थारल्या. भाजप आनी आप हांच्या आक्रमक प्रचारा कडेन मुकाबलो करपाचें त्राणूय काँग्रेस पक्षांत ना. अशे परिस्थितींत भाजप आनी आप अशीच ही मॅच रंगूक शकता. ‘आप’ च्यो फुकट रेवड्यो कितें रंग दाखयतल्यो हाचीय जाप हे वेंचणुकेंत मेळटली.

वामन प्रभू
9823196359