भांगरभूंय | प्रतिनिधी
कम्युनिटी अगेन्स्ट ड्रंक अॅण्ड ड्रायव्हिंग कंपनीचें सर्वेक्षण
नवी दिल्ली, खबरां संस्था ः राजधानी दिल्लींत केल्ल्या सर्वेक्षणांतल्यान 81.2% लोक सोऱ्याच्या नशेंत गाडी चलयतात अशें दिसून आयलां. 67.8% लोकांनी रस्ते वापरतना असुरक्षितताय जाणवता अशें मान्य केलां.
कम्युनिटी अगेन्स्ट ड्रंक अॅन ड्रायव्हिंग (सीएडीडी) कंपनीन फाटल्या वर्सा 1 ऑगस्ट ते 31 डिसेंबर ह्या काळांत 30 हजार लोकांचेर हें सर्वेक्षण केलां. तातूंत 20 हजार 776 दादले आनी 9 हजार 224 बायलांचो वांटो आशिल्लो. सर्वेक्षणा प्रमाण 90% लोकांक अपघातांचो आंकडो वाडला अशें दिसतालें. 71.1% लोकांनी दिल्लीच्या रस्त्यांचेर कांय व्हड वा ल्हान अपघात पळयल्याचे सांगले. कांय जाण गंभीर जखमी जाले अशें सांगलें.
सर्वेक्षणांतल्या लोकांनी सांगलें, वाहनांची घनताय चड आशिल्ल्या वाठारांनी चड असुरक्षितताय जाणवता. 85.3% लोकांनी व्हड वा ल्हान रस्त्याच्या अपघातांक कांय जाणांक मरण आयिल्ल्याचें कबूल केलां. कांय जाण शारिरीक जखमीय जाल्यात. त्याच वेळार अपघाताची म्हायती दिवपी वा पिडितांक मजत करपी लोकांचो आंकडो 15% परस उणो आशिल्लो.
रस्त्याचे सुरक्षे खातीर सीएडीडीन सर्वेक्षण केलें….
रस्त्याचे सुरक्षे विशीं लोकांची वागणूकेचे मूल्यांकन करपा खातीर सीएडीडीन हें सर्वेक्षण केलें. हातूंत चलपी, स्कुटर चलोवपी, कार चालक, भौशीक येरादारी वापरपी लोक, कॅब चालक, ऑटो रिक्शा चालक, मिनी व्हॅन चालक आनी हेर दिल्लीच्या लोकांचो आस्पाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
