भांगरभूंय | प्रतिनिधी
नवी दिल्ली, खबरां संस्था ः देशाची राजधानी दिल्लींत तापमान सुमार 50 अंशा मेरेन पावलां. राजस्थानांतल्यान येवपी उश्ण वारें आनी खर वताक लागून दिल्लीच्या भायल्या वाठारांनी तापमान वाडलां. भारतीय हवामान खात्यान दिल्ले म्हायती प्रमाण, फुडले कांय दीस दिल्लींत खर उश्णताय उरतली. दुसरे वटेन दिल्लींत उदकाचेंय संकश्ट आसा.
दिल्ली, मध्य आनी वायव्य भारतांतल्या जायत्या वाठारां भशेन मुंगेशपूर आनी नरेला हांगाच्या दोन स्वयंचलीत हवामान केंद्रांचेर चडांत चड तापमान 49.9 अंश सेल्सियस मेरेन पावलें. दिल्ली विद्यापिठा लागसार आशिल्ल्या आया नगर आनी रिज हांगाच्या वेधशाळांनी अनुक्रमान 47.6 अंश सेल्सियस आनी 47.5 अंश सेल्सियस तापमान नोंद जालां. शारांतल्या सफदरजंग बेस स्टेशनाचेर चडांत चड तापमान 45.8 अंश सेल्सियस नोंद जाला, जें ह्या हंगामांत आतां मेरेनचें सगळ्यांत चड तापमान आसा. मे 2020 वर्सा सगळ्यांत चड तापमान 46 अंश सेल्सियस मेरेन पावलें. भारतीय हवामान विभागाच्या म्हायती प्रमाण बुधवारा चडांत चड तापमान सुमार 46 अंश सेल्सियस आसतलें.
दिल्लींत रेड अलर्ट
मे म्हयन्याच्या निमाण्या दिसांनी दिल्लींत तापमानांत व्हड प्रमाणांत वाड जाल्या. खर उश्णतायेक लागून फुडल्या दोन दिसां खातीर शारांत ‘रेड अलर्ट’ जारी केला. जायत्या वाठारांनी आयज खर उश्णताय आनी खर वारें येवंक शकता असो अदमास भारतीय हवामान विभागान उक्तायला.
मजगतीं, एक वटेन गर्मी, खर उश्णताय जाल्यार दुसरे वटेन दिल्लींत उदकाचें संकश्ट आयला. दिल्लीच्या जायत्या वाठारांनी उदकाचो व्हड उणाव जाला. दिल्लीची 64 टक्के उदकाची गरज हरियाणा कडल्यान पुराय जाता जाल्यार 26.5 टक्के उत्तर प्रदेशांतल्यान पुराय जाता अशें ताज्या अर्थीक सर्वेक्षणांतल्यान उक्तें जालां. 2022-23 वर्साच्या सर्वेक्षणांतल्यान शाराची उदकाची गरज दिसाक 1290 दशलक्ष गॅलन (MGD) इतली आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
