भांगरभूंय | प्रतिनिधी
भाजप 48, आप 22, काँग्रेस 0 ; दिल्ली सचिवालय सील
खबरां संस्था
नवी दिल्लीः दिल्लींत भाजपाक 27 वर्सांनी स्पश्ट भोवमत मेळ्ळां. भाजपान 48 आनी आम आदमी पक्षान (आप) 22 सुवातांचेर जैत मेळयलां. काँग्रेसीक एकूय सुवात जिखपाक जमलें ना. आपचे अरविंद केजरीवाल नवी दिल्लींतल्यान आनी सिसोदिया जंगपुरा मतदारसंघांतल्यान वेंचणूक हारले. मुख्यमंत्री आतिशी हांणी कालकाजी मतदारसंघांतल्यान वेंचणूक जिखली. सत्येंद्र जैन तशेंच मनीष सिसोदिया हांकांय वेंचणुकेंत हार खावची पडली. हारी उपरांत केजरीवाल हांणी सांगलें, आमकां हार मान्य आसा. भाजपाक जैता खातीर परबीं दितां.
1993 त भाजपान 53 सुवातो जिखिल्ल्यो, म्हणल्यार दोन तृतियांश भोवमत मेळयल्लें. 5 वर्सांच्या सरकारांत मदनलाल खुराणा, साहीब सिंग वर्मा आनी सुषमा स्वराज हांकां मुख्यमंत्री केल्ले.
मजगतीं, दिल्ली सरकाराच्या सामान्य प्रसाशन विभागान सचिवालय सील करपाचे आदेश जारी केल्यात. तातूंत तांणी म्हणलां, कसलीच फायल, कागदपत्रां वा कंप्युटर हार्डवेअर सचिवालयाच्या वाठारांतल्यान परवानगे बगर भायर व्हरचें न्हय.
फाटले वेंचणुकेचे (2020) तुळेंत भाजपान आपल्यो 39 सुवातो वाडयल्यात जाल्यार आपान 39 सुवातो व्हगडायल्यात. हे खेपेय काँग्रेसीचो हात रितोच उरलो. तिका एकूय सुवात मेळूंक ना. 2020 चे वेंचणुकेचे तुळेंत भाजपान आपल्या मतांचे टक्केवारींत 9 टक्के परस चड वाड केल्या. आपाक 10 टक्के परस चड लुकसाण जालां. काँग्रेसीक एकूय सुवात मेळूंक नासली तरीय तांकां तांच्या मतांचो वांटो 2 टक्क्यांनी वाडोवपाक येस मेळ्ळां.
दिल्लीकारां मदीं उमेद, सुसेग
नवी दिल्लीः दिल्लीचो धनी आशिल्ल्याचो जाका गर्व आशिल्लो, ताका सत्याक फुडो करचो पडलो. दिल्लीच्या जनादेशांतल्यान स्पश्ट जाता, राजकारणांत शॉर्टकटा खातीर फट, विस्वासघाताक कसलीच सुवात ना. लोकांनी शॉर्टकट राजकारणाचें शॉर्ट सर्कीट केलें. आयज दिल्लीच्या लोकां मदीं एक उमेद आनी सुसेग लेगीत आसा. दिल्लीकारांनी भरभरून मोग दिलो. दिल्लीकारांचें आपूण उपकार मानतां, अशें प्रधानमंत्री नरेंद्र मोदी हांणी सांगलें.
दिल्ली विधानसभा वेंचणुकेंत भाजपाच्या जैता उपरांत प्रधानमंत्री मोदी हांणी भाजपा मुख्यालयांत कार्यकर्त्यांक मार्गदर्शन केलें. तांणी आपल्या भाशणाची सुरवात ‘यमुना मैया की जय’ हे घोशणेन केली.
काँग्रेस परावलंबी पार्टी जाल्या. स्वता बुडटाच आनी आपल्या सांगात्यांक लेगीत घेवन बुडटा. काँग्रेसीन एका उपरांत एक सांगाती सोंपयले. इंडी आघाडेचे पक्ष आतां काँग्रेसीचें चरित्र वळखुपाक लागल्यात, अशें मोदी हांणी सांगलें. देशभरांतल्या भाजपा कार्यकर्त्यांच्या आनी दिल्लीच्या भाजपा कार्यकर्त्यांच्या काळजांत एक खंत आशिल्ली, ती म्हणल्यार दिल्लीची सेवा पुराय तरेन करपाक मेळना हाची. आयज दिल्लीन आमची तिवूय विनवणी मानून घेतली. सगळ्या कार्यकर्त्यांचें उपकार मानतां, अशें मोदी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
