भांगरभूंय | प्रतिनिधी
सरकारान दिली विधानसभेंत म्हायती
नवी दिल्ली, खबरां संस्था: दिल्लींत अरविंद केजरीवाल हांच्या आम आदमी पक्षान सत्तेंत आसतना लागू केल्ल्या सोरो धोरण घोटाळ्याची सदांच चर्चा जाता. मजगतीं, दिल्लींतल्या भाजपा सरकारान चालू अर्थीक वर्सा सोरो विक्री कर आनी दुद करांतल्यान मेळिल्ल्या पयशांची नेमकी रक्कम राज्य विधानसभेंत मांडल्या. ते प्रमाण चालू अर्थीक वर्सा सोर्याचेर करांतल्यान ५ हजार कोटी परस चड आनी दुद आनी दुदाच्या उत्पादनांतल्यान फकत २१० कोटी रुपया एकठांय जाल्यात अशें सरकारान सांगलां.
दिल्ली विधानसभेंत भाजपा आमदार अभय वर्मा हांणी केल्ल्या प्रस्नाक जाप दितना सरकारान सांगलें, २०२४-२५ वित्तीय वर्सा सोर्याचे विक्रीचेर अबकारी कर आनी व्हॅट (व्हॅल्यू ऍडेड टॅक्स) वयल्यान ५,०६८.९२ कोटी रुपयांची येणावळ मेळ्ळ्या. दुदाचे आनी दुदाच्या उत्पादनांचेर जीएसटींतल्यान २०९.९ कोटी रुपया मेळ्ळ्यात. हे दोनूय आंकडे फेब्रुवारी मेरेनचे आसात.
भाजपान आम आदमी पक्षाचेर कथीत सोरो धोरण घोटाळ्यावेल्यान आरोप करतना हो आंकडो मुखार आयलो. आपचे फुडारी आनी दिल्लीचे आदले मुख्यमंत्री अरविंद केजरीवाल आनी आदले उपमुख्यमंत्री मनीष सिसोदिया हे दोन फुडारी ह्या सोरो घोटाळो प्रकरणांत बंदखणींत वचून आयले. कांय दिसां आदीं जाल्ले दिल्ली विधानसभा वेंचणुकेंत आम आदमी पक्ष हारपाचें हें एक व्हड कारण थारलें.
रेखा गुप्ता हांच्या फुडारपणा खाला भाजपा सरकारान २०२३-२४त सोर्याचेर लायिल्ल्या करांतल्यान ५,१६४ कोटी रुपया, २०२२-२३त ५,५४७ कोटी रुपया आनी २०२१-२२त ५,४८७ कोटी रुपया मेळिल्ल्याचें सांगलें. दिल्लींत आम आदमी पक्षाच्या कार्यकाळांत नवें सोरो धोरण लागू जाल्ल्यान नोव्हेंबर २०२१ ते ऑगस्ट २०२२ ह्या काळांत फकत खाजगी दुकानांक सोरो विक्रेची परवानगी आशिल्ली, अशें सरकारान म्हणलें. मात सप्टेंबर २०२२त आदलें सोरो धोरण परत लागू केलें तेन्ना सरकारी सोर्याचीं दुकानां सुरू करपाक परवानगी दिली.
आम आदमी पक्षान म्हणिल्लें, नव्या सोरो धोरणाचो हेत हो काळो बाजार बंद करप, सरकाराक मेळपी येणावळ वाडोवप आशिल्लो. मात फुडलयाच वर्सा दिल्लीच्या मुखेल सचिवांनी धोरणांत कांय अनियमितताय जाल्ल्याचें उक्तें केल्लें.
सदांच ५.८२ लाख लिटर विक्री
दिल्लींत २०२३-२४ वर्सा २१.२७ कोटी लिटर सोरो विकलो, म्हळ्यार दर दिसा सुमार ५.८२ लाख लिटर. जाल्यार २०२२-२३ त हो आंकडो २५.८४ कोटी लिटर जाल्लो. २०२४-२५ वर्सा २१० कोटी रुपयांच्या तुळेंत, सरकारन २०२३-२४ वर्सा दुदाचे विक्रेंत सुमार ३०० कोटी रुपय आनी २०२२-२३ वर्सा ३६५ कोटी रुपया जोडिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
