भांगरभूंय | प्रतिनिधी
दिल्लींत हालींच जाल्ले विधानसभा वेंचणुकेंत भाजपान 70 पैकीं 48 सुवातांचेर जैत मेळोवन व्हड संख्येन भोवमत मेळयलें. आम आदमी पक्षाक फक्त 22 सुवातांचेर समाधान मानचें पडलें. काँग्रेसीक मात आपलें खातेंय उक्तें करूंक जमलें ना. वेंचणुकेचे पयलीं चडशे एक्झीट पोल भाजपाच्या जैताचो अदमास उक्तायताले आनी तांचो अदमास खरो थारलो. हरशीं एक्झीट पोल अदमास उक्तायतात त्या वेळार तांचो अदमास एकेक फावटी चुकता. पूण हे फावटी मात तांचो अदमास सामको खरो थारलो. हे वेंचणुकेंत आम आदमी पक्षाच्या व्हड व्हड फुडाऱ्यांक हार खावची पडली. तातूंत आदले मुख्यमंत्री आनी आम आदमी पक्षाचे संस्थापक अरविंद केजरीवाल हांची हार खूब मोटी आसा.
नवी दिल्लीची सुवात अरविंद केजरीवाल भाजपा कडल्यान जितल्या मतांनी हारले ताचे परस चड मतां काँग्रेसीच्या संदीप दीक्षित हांकां मेळ्ळीं.
ताचे फाटोफाट आदले उपमुख्यमंत्री मनीश सिसोदिया हांकांय हार खावची पडली. हे वेंचणुकेंत आम आदमी पक्षाच्या खूबशा आमदारांक हार खावची पडली. भाजपाच्या जैताचें विश्लेशण करीत जाल्यार सकयल दिल्ल्यो गजाली नदरेक येतात.
भाजपाचें वेंचणुकेंतलें वेवस्थापन
हे वेंचणुकेंत भाजपान बूथ पांवड्यार वेवस्थीत नियोजन केल्लें. खूबशा राज्याच्या मंत्र्यांक वेगळ्यावेगळ्या मतदारसंघाची जापसालदारकी दिल्ली. नरेंद्र मोदी आनी अमीत शाह हांणी खूबशे रोड शो आनी प्रचार सभा घेतल्यो. ताचोय परिणाम मतदारांचेर जालो.
आपाचो भ्रश्टाचार आनी सोरो धोरणाचो परिणाम
आम आदमी पक्षाची सुरवातीची प्रतिमा ल्हवू ल्हवू निवळत चल्ल्या. खूबशे फुडारी भ्रश्टाचाराच्या घोटाळ्यांत आडकल्यात. केजरीवालान आपल्या सरकारी निवासस्थानाचेर व्हड प्रमाणांत पयशे मोडले. तशेंच सोरो धोरणाचो परिणाम मतदारांचेर खुबूच जालो. हाका लागून केजरीवाल हांची प्रतिमा खालावली आनी तांकां हारीक सामकार वच्चें पडलें.
काँग्रेस पक्षाची भुमिका
काँग्रेस पक्षान वेंचणुके पयलीं स्वतंत्रपणान वेंचणूक लडोवपाची भुमिका घेतली. हाचो फायदो भाजपाक जालो. काँग्रेस पक्षाक लागून सुमार 8 ते 10 सुवातांचेर आम आदमी पक्षाक हार खावची पडली आनी ताचो फायदो भाजपाक जालो. काँग्रेसीन आपले स्वतंत्र उमेदवार उबे केल्ल्यान तांच्या मतांचें विभाजन जावन हाचो फायदो भाजपाक जालो. खूबशा मतदारसंघांनी कांठा वेल्या फरकान आम आदमी पक्ष फाटीं गेल्ल्याचें दिसून आयलें. हातूंत काँग्रेसीक जरी एकूय सुवात मेळ्ळी ना तरी काँग्रेसीक पडिल्ल्या मतांची टक्केवारी पळयत जाल्यार आपाचे गणीत कोलमडिल्ल्याचें चित्र आशिल्लें.
अँटिइकंबन्सीचो फटको
फाटले सुमार तीन टर्म्स आम आदमी पक्ष सत्तेंत आशिल्लो. सहाजिकूच ताचें कांय प्रमाणांत लुकसाण तांकां सोंसचे पडलें. तशेंच आम आदमी पक्षान दिल्ली सोडून हेर राज्यांनी लक्ष दिल्ल्यान दिल्ली कडेन तांची आडनदर जाली. आपान दिल्ली सोडून पंजाब, गोंय, गुजरात आदीं राज्यांनी आपलें बस्तान बसोवपाक सुरवात केली. पंजाब सोडीत जाल्यार हेर कडेन तांकां सामकें उण्या प्रमाणांत येस मेळ्ळें. सहाजिकूच ताका लागून दिल्ली कडेन तांची आडनदर जाली.
अदमासपत्रांतल्या घोशणांचो भाजपाक फायदो
वेंचणुके पयलीं केंद्र सरकारान केंद्र कर्मचाऱ्यां खातीर आठव्या वेतन आयोगाची घोशणा केली तशेंच कर्मचाऱ्यांक 12 लाखां मेरेनच्या उत्पन्नाचेर करांतल्यान सूट जाहीर केली. दिल्लींत खूबशे केंद्रीय कर्मचारी आसात. ताचो फायदो भाजपाक जालो.
नरेंद्र मोदी हांचे लोकप्रियतेचो फायदो
प्रधानमंत्री नरेंद्र मोदी हांचे लोकप्रियतेचो फायदो भाजपाक जालो. देशांत हाचे पयलीं महाराष्ट्र, हरियाणा ह्या राज्यांनी भाजपाक जैत मेळिल्लें. भाजपान महाराष्ट्रांत जाल्यार दोळे दिपकावपी जैत जोडिल्लें हाचोय परिणाम मतदारांचेर जावन मतदार भाजपा वटेन घुंवले.
खूबशा लोकप्रीय घोशणांचो फायदो
भाजपान आपल्या जाहीरनाम्यांत लाडक्या भयणी खातीर दर म्हयन्याक 2500 रुपया, जाण्ट्यांक मजत, वीज फुकट, गॅस सिलिंडर फुकट आदीं स्वरुपाच्यो लोकप्रीय घोशणा केल्ल्यो. ताचो मतदारांचेर व्हड प्रमाणांत परिणाम जालो.
दिल्लीतल्या नवी दिल्ली, ग्रेटर कैलाश, जंगपुरा, राजेंद्र नगर, मादीपूर, मालवीय नगर, बादली, छत्तरपूर, कस्तुरबा नगर, महरौली, नांगलोई जाट, संगम विहार, तिमारपूर, त्रिलोकपुरी बी सुवातांचेर व्हड प्रमाणांत आपाचें मतविभाजन पळोवंक मेळ्ळें.
आतां 27 वर्सा उपरांत भाजपान दिल्लींतली सत्ता मेळयल्या. केंद्र आनी राज्यांत एकाच पक्षाचें सरकार आशिल्ल्यान आतां राज्यकारभार सुरळीत चलूंक लागतलो. अर्थांत खूबशो लोकप्रीय येवजण्यो चालीक लायतना भाजपाची खरी कसवटी लागतली.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
