भांगरभूंय | प्रतिनिधी
गुप्ता हांणी रामलीला मैदानार घेतलो सोपूत : प्रवेश वर्मा सयत 6 मंत्री
खबरां संस्था
नवी दिल्ली : शालीमार बाग मतदारसंघांतल्यान पयलेच खेपे आमदार जाल्ली रेखा गुप्ता (50) हांणी बिरेस्तारा दिल्लीच्या रामलीला मैदानाचेर सोपूत घेतलो. ती दिल्लीची णववी आनी चवथी महिला मुख्यमंत्री जाली.
रेखा हांचे आदीं सुषमा स्वराज, शीला दीक्षित आनी आतिशी महिला मुख्यमंत्री आशिल्ल्यो. सोपूत सुवाळ्याक प्रधानमंत्री नरेंद्र मोदी आनी गृहमंत्री अमीत शाह हांचे सयत भाजपशासीत 21 राज्यांचे मुख्यमंत्री आनी उपमुख्यमंत्री लेगीत हाजीर आशिल्ले. आप फुडारी अरविंद केजरीवाल आनी आतिशी सोबत सुवाळ्याक हाजीर रावूंक नाशिल्ले.
रेखा हांचे वांगडा प्रवेश वर्मा सयत 6 मंत्र्यांनी सोपूत घेतलो. सोपूत घेतिल्ल्या मदीं अरविंद केजरीवाल हांचेर जैत जोडिल्ले प्रवेश वर्मा तशेंच आशिष सूद, मनजिंदर सिंग सिरसा, रवीन्द्र इंद्ररारज सिंग, कपील मिश्रा आनी पंकड कुमार सिंग हांचो आस्पाव आसा.
सोपूत घेवचे आदीं रेखा गुप्ता हांणी बिरेस्तारा सकाळीं पत्रकारां कडेन उलयतना सांगलें, ही एक व्हड जापसालदारकी आसा. आपल्याचेर विस्वास दाखयल्ले खातीर आपूण प्रधानमंत्री मोदी आनी पक्षाच्या हायकमांडाचे उपकार मानतां. आपूण दिल्लीची मुख्यमंत्री जातली असो आपणें केन्ना विचारूच करूंक नाशिल्लो. आपूण कंवचेच्या महलांत रावचीं ना. दिल्लीच्या मुख्यमंत्र्यांच्या अधिकृत बंगल्याचें नांव भाजपान शीशमहल दवरलां. अरविंद केडरीवाल हांणी तो बांदिल्लो. केजरीवाल हांणी नेम मोडून तो बांदचे खातीर कोटींनी रुपया खर्च केल्ल्याचो आरोप भाजपान केला. भाजपान लेगीत तो वेंचणुकेचो मुद्दो केल्लो.
खातें वांटप
दिल्लींत भाजप सरकारान सोपूत सुवाळ्या उपरांत साडेचार वरां भितर मंत्र्यांक खातें वांटप केलें. मुख्यमंत्री रेखा गुप्ता हांचे कडेन गृह मंत्रालयाची जापसालदारकी आसतली. तशेंच अरविंद केजरीवाल हांकां हारयल्ले प्रवेश वर्मा हांकां उपमुख्यमंत्री केल्यात. तांकां शिक्षण आनी येरादारी मंत्रालयाची जापसालदारकी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
